१३ चैत , एजेन्सी ।
भेट्रान फरवार्ड तथा कप्तान क्रिष्टियानो रोनाल्डोको उच्च प्रदर्शनमा पोर्चुगलले युरो २०२४ को छनोट खेलमा सानदार जित दर्ता गरेको छ । पोर्चुगलले घरेलु टोली लक्जेमवर्गमाथि उसकै मैदानमा ६–० को सानदार जित निकाल्दै लगातार दोस्रो जित आत्मसात गरेको हो ।
पोर्चुगलको फराकिलो जितमा कप्तान रोनाल्डोले दुई तथा जोआओ फेलिक्स, बर्नाडो सिल्भा, ओटाभियो र राफयल लियोले समान एक गोल गरे । पोर्चुगलले पहिलो हाफमा चार तथा दोस्रो हाफमा दुई गोल थप्दै सानदार जित निकाल्न सफल भयो । कतार विश्वकपपछि पोचुगलको यो लगातार दोस्रो जित हो ।
यसअघि पोर्चुगलले छनोट प्रतियोगितामा लिचेस्टाइनलाई ४–० ले हराएको थियो । विश्वकपपछि पोर्चुगल रोबर्टो मार्टिनेजको प्रशिक्षणमा खेलिरहेको छ । मार्टिनेज बेल्जियमका पूर्व प्रशिक्षक हुन् । गएराति रोनाल्डोले नवौँ मिनेटमा गरेको गोलबाट पाहुना टोली पोर्चुगलले अग्रता लिएको थियो ।
१५औँ मिनेटमा जोओ फेलिक्सले पोर्चुगलको अग्रता दोब्बर बनाए । १८औँ मिनेटमा बर्नार्डो सिल्भाले तेस्रो गोल गरे । ३१औँ मिनेटमा रोनाल्डोले व्यक्तिगत दोस्रो गोल गरे । यससँगै रोनाल्डोले अन्तर्राष्ट्रिय गोल सङ्ख्या १२२ पु¥याएका छन् । रोनाल्डोले १९८ खेलमा १२२ गोल गरेका हुन् ।
रोनाल्डो अन्तर्राष्ट्रिय फुटबलमा सबैभन्दा धेरै गोल गर्ने खेलाडी हुन् । यस्तै ७७औँ मिनेटमा ओटाभियोले गोल गरे । ८९औँ मिनेटमा राफेल लियोले अर्को गोल थपे । लियो ८५औँ मिनेटमा पेनाल्टीमा गोल गर्न चुकेका थिए। जितसँगै छनोट प्रतियोगिताको समूह ‘जे’मा पोर्चुगल शीर्ष स्थानमा छ । पोर्चुगलले ६ अंक जोडेको छ । दोस्रो स्थानको स्लोभाकियाले ४ अंक जोडेको छ ।
स्लोभाकियाले गएराति बोस्निया एन्ड हर्जगोभिनालाई २–० ले हराएको थियो । बोस्निया एन्ड हर्जगोभिना तीन अंकका साथ तेस्रो स्थानमा छ । समान तीन अंक जोडेको आइसल्यान्ड चौथो स्थानमा छ । एक अंक जोडेको लक्जमबर्ग पाँचौँ र अंकविहीन लिचेस्टाइन छैटौँ स्थानमा छ । आइसल्यान्डले गएराति लिचेस्टाइनलाई ७–० ले हराएको थियो ।
