२६ जेठ, एजेन्सी ।
फ्रान्सेली फरवार्ड करिम बेन्जेमालाई साउदी प्रो लिग च्याम्पियन अल इतिहादमा सार्वजनिक गरिएको छ ।अल इतिहादले यसै साता बेन्जेमालाई स्पेनिस क्लब रियल म्याड्रिडबाट अनुबन्ध गर्न सफल भएका थिए । उनलाई बिहीबार राति अल इतिहादको रंगशालामा झन्डै ६० हजार समर्थक माझ सार्वजनिक गरिएको हो ।
सो अवसरमा बेन्जेमाले फिफा बालोन डि ओरको ट्रफी समेत सार्वजनिक गरेका थिए । एक पल्टको बालोन डी’ओर विजेता करिम बेन्जेमाले रियल म्याड्रिडमा १४ वर्षको बसाईलाई बिट मार्दै साउदी अरेबियाको च्याम्पियन अल–इतिहादसँग ३ वर्षको सम्झौता गरेका हुन् ।
३५ वर्षीय फ्रान्सेली स्ट्राइकर बेन्जेमाले म्याड्रिडसँग १४ वर्षमा ५ च्याम्पियन्स लिग र चार ला लिगासहित २५ ट्रफी जितेका थिए । उनले रियलका लागि ३५४ गोल गरेका छन् । उनी क्रिस्टियानो रोनाल्डोपछि रियलको दोस्रो सर्वाधिक गोलकर्ता हुन् । रियलमा ४५० गोल गरेका रोनाल्डो अर्को साउदी क्लब अल–नासरबाट खेल्छन् ।
उनी गत जनवरीदेखि अल नासरमा छ । अल–इतिहाद पूर्व वल्भ्स र टोटेनहम प्रशिक्षक नुनो एस्पिरिटो सान्तोको प्रशिक्षणमा छ । सन् २००९ मा फ्रान्सेली क्लब लियोनबाट रियल पुगेका बेन्जेमाले रियलका लागि ६४८ खल खेलेका छन् ।उनले क्लबका लागि अन्तिम खेलमा पनि गोल गर्न सफल भएका थिए । गत आइतबार एथलेटिको बिल्बाओसँग १–१ को बराबरीमा उनले पेनाल्टीमा गोल गरेका थिए ।
