४ असार, काठमाण्डौ ।
गणतन्त्र दिवसमा आममाफी पाएर रिहाइ भएका नागरिक उन्मुक्ति पार्टीका संस्थापक चौधरी पछिल्लो समय राजनीतिक भेटघाट र देश दौडाहामा व्यस्त छन् । यसक्रममा आज उनले नेकपा एमाले अध्यक्ष केपी शर्मा ओलीसंग भेट गरेका छन् । सोमबार बिहान ओली निवास बालकोटमा उनीहरूबीच भेटवार्ता तथा छलफल भएको हो ।
सो भेटमा दुवै नेताका बीचमा समसामयिक राजनीतिका विषयमा कुराकानी भएको बताइएको छ । एमाले अध्यक्ष ओलीले टीकापुर घटनामा अन्याय भएको रेशमलाई सुनाएका थिए । ’हामीबीच राजनीतिक भेटघाट भएको हो । भेटमा उहाँले साह्रै अन्यायमा पर्नुभएको बताउनुभयो,’ रेशमले भने । ओलीले आफू जेल बसेका कुरा पनि रेशमसँग स्मरण गरेका थिए ।
उनले न्यायका लागि लड्दा आफू कसरी जेल परेको र जेलमा के–कस्ता यातना दिएको कुरा स्मरण गरेको रेशमले बताए । ’उहाँको जेल जीवन पनि एकदमै कस्टकर थियो। उहाँले कसरी जेल पु¥याएको, कसरी गोलघरमा राखेको, जाडो, गर्मी कसरी कटाएको बारे बताउनुभयो,’ उनले भने। रेशम चौधरी जेलमा रहँदा एमाले अध्यक्ष ओलीले ज्याकेट र जुत्ता पठाइदिएका थिए ।
उनले जाडोको बेला पठाइदिएको गिफ्टप्रति ओलीलाई भेटेरै समेत धन्यवाद दिए । यसअघि रेशमले प्रधानमन्त्री पुष्पकमल दाहाल प्रचण्ड र नेपाल समाजवादी पार्टीका अध्यक्ष डा. बाबुराम भट्टराईलगायतसँग पनि भेटघाट गरेका थिए । प्रधानमन्त्री दाहालसंग जेठ २९ गते बालुवाटारमा भएको भेटवार्तामा रेशमसंगै उनकी पत्नी भूमि व्यवस्था, सहकारी तथा गरिबी निवारण मन्त्री रञ्जिता श्रेष्ठ पनि सहभागी थिइन् ।
सो क्रममा सुदूरपश्चिम प्रदेशमा पूर्वसहमतिअनुसार दुई मन्त्री र एक राज्यमन्त्री पाउनुपर्ने भन्दै चौधरीले प्रधानमन्त्री प्रचण्डको ध्यानाकर्षण गराएका थिए । त्यस्तै, चौधरीले टीकापुर घटनामा थारूहरू अन्यायमा परेको भन्दै न्याय दिलाउन र सो घटनामा निर्दोष थारूहरु जेलमा रहेको भन्दै रिहाइका लागि अनुरोध गरेका थिए ।
उनले लाल आयोगको प्रतिवेदन सार्वजनिक गरेर निर्दोष थारूहरुलाई न्याय दिनुपर्ने सुझाव दिएका थिए । रेशमले पूर्वप्रधानमन्त्री बाबुराम भट्टराईसंग पनि भेट गरेका थिए । बाबुरामले उनलाई खाँदा लगाएर स्वागत गरेका थिए । आफ्नै निवास आएका रेशमलाई स्वागत गरेको तस्वीर भट्टराईले सामाजिक सञ्जालमा राखेका थिए ।
टीकापुर घटनामा दोषी ठहर भई जन्मकैदको सजाय सुनाइएका रेशमलाई गत १५ जेठमा गणतन्त्र दिवशको अवसरमा राष्ट्रपति रामचन्द्र पौडेलले आममाफी दिएका थिए । रेशमले आजै धरानका मेयर हर्क साङपाङलाई भेट्ने कार्यक्रम छ ।
