२१ असार, एजेन्सी ।
बेलारूसी राष्ट्रपति अलेक्ज्यान्डर लुकाशेन्कोले रूसी निजी सेना कम्पनी वाग्नर समुहका नेता येभगेनी प्रिगोजिन देश फिर्ता भएको बताएका छन् । रुसी राष्ट्रपति भ्लादिमिर पुटिन विरुद्धको असफल विद्रोह र त्यसपछि बेलारुसमा शरण लिएको घटनापछि वाग्नर समूहका प्रमुख येभगेनी प्रिगोजिन स्वदेश फर्किएका हुन् ।
लुकाशेन्कोले अहिले प्रिगोजिन रूसी सहर सेन्ट पीटर्सबर्गमा भएको बताएका हुन् । गत महिना रूसमा वाग्नर समूहले सशस्त्र विद्रोह गरेको थियो । तर, बेलारूसी राष्ट्रपति लुकाशेन्कोको मध्यस्थतामा भएको वार्ताले एक दिनमै विद्रोह शान्त भएको थियो । केही दिन अघि मात्रै प्रिगोजिनले ’हिंसक विद्रोह’ को बचाउ गर्दै यसलाई ’न्यायको लागि मार्च’ भनेर वर्णन गरेका थिए ।
उनले आफ्नो मिशन ’राष्ट्रविरोधी लड्ने र समाजलाई एकताबद्ध गर्ने’ रहेको दाबी गरेका छन् । प्रिगोजिनले रुसका जनतालाई बाग्नरको सेनाको लागि खडा हुन अपील पनि गरेका छन् । रुसी जनतालाई गरिएको आफ्नो अनुरोधमा उनले भनेका छन् ,’हामीलाई तपाईंको समर्थन पहिले भन्दा बढी चाहिन्छ।’
सोमबार आफ्नो सन्देशमा उनले भनेका थिए ’आगामी भविष्यमा, म विश्वस्त छु कि तपाईले हामीलाई हाम्रो अर्को जित अगाडि देख्नुहुनेछ।’ यो अभिब्यक्तिपछि उनी रुस फर्किनुलाई महत्वका साथ हेरिएको छ । यसअघि बेलारुसका राष्ट्रपति अलेक्ज्याण्डर लुकाशेन्कोले पुटिन र वाग्नर प्रमुखहरू बीचको एउटा सम्झौतालाई मध्यस्थता गरेपछि प्रिगोजिन र उनका सेनाहरु निर्वासनमा गएका छन् ।
विदेशी र बेलारूसी मिडिया प्रतिनिधिसँगको भेटमा लुकाशेन्कोले रूस र युक्रेनलाई कुनै पूर्वशर्तबिना वार्ताको टेबलमा आउन सुझाव दिएका छन् । उनले भनेका छन्, “हामी अब रोकिनु पर्छ। हामीले पहिले नै धेरै गलत काम गरिसकेका छौं। यो अझै खराब हुनसक्छ । त्यसैले अब रोकिनुपर्छ ।”
यस्तै, अर्को हप्ता लिथुआनियामा हुने नेटो शिखर सम्मेलनअघि युक्रेनले रूसविरुद्ध आफ्नो शक्ति प्रदर्शन गर्ने उनको भनाइ छ । यसबीच युक्रेनको पश्चिमी सहर ल्भिभको एउटा अपार्टमेन्टमा रूसले गरेको मिसाइल आक्रमणमा चारजनाको मृत्यु भएको छ ।
