३० असार,एजेन्सी ।
३ वर्षअघि चार बलात्कार तथा यौन दुर्व्यवहारको आरोप लागेर म्यानचेस्टर सिटीका डिफेन्डर बेन्जामिन मेन्डी निलम्बनमा परेका थिए । जसका कारण उनको २८ वर्षमै फुटबल करिअर धरापमा परेको थियो । उनै बेन्जामिन मेन्डी शुक्रबार भने निर्दोष सावित भए । चेस्टर क्राउन कोर्टमा तीनसाता लामो सुनुवाइपछि न्यायाधीशले उनलाई निर्दोष भएको फैसला सुनाएपछि यी फ्रान्सेली स्टारको आँखामा आँसु थामिएनन् ।
उनका लागि यी आरोपबाट मुक्त हुन पनि जरुरी थियो किनकि उनको अन्तर्राष्ट्रिय र क्लब फुटबल करिअर नै तहसनहस हुन लागेको थियो । मेन्डीका लागि महिलाहरूले बलात्कार र यौनजन्य हिंसाको कुरा पहिलो पटक उठाएका होइनन् । सायद उनको यो मुद्दा पनि बलात्कार र महिला हिंसामा अन्त्य हो भन्न पनि सकिन्न । किनकि यो बीचमा उनीमाथि धेरै महिलाहरूले बलात्कार र यौन हिंसाका कुराहरू उठाएका थिए ।
मेन्डीको फुटबल करिअरमै असर पार्ने यो काण्डको सुरुवात भने २०२० को अक्टोबर मा सुरु भएको थियो । जतिबेला उनी म्यानचेस्टर सिटीमा अनुबन्धित थिए । यी २८ वर्षीय युवकलाई आफ्नो ४ मिलियन पाउन्डको बंगालामा एक २४ वर्षीय महिलालाई लगेर बलात्कार गरेको आरोप लागेको थियो । त्यसो त उनीमाथि अर्की एक २९ वर्षीया महिलाले पनि बलात्कार प्रयास गरेको आरोप लगाएकी थिइन् ।
उनले पनि दुई वर्षअघि आफ्नो घरमा नै लगेर दुर्व्यवहार गरेको आरोप लगाएकी थिइन् । त्यसो त उनका यी मुद्दा गत जनवरीमा छवटा बलात्कार मुद्दाको सफाइपछि आएको थियो । त्यसैले त मेन्डीका लागि यो फैसला अन्तिम बन्न सक्छ भन्न सकिन्न । न्यायाधीश स्टिभन एभरेटले भने, ‘मेन्डीलाई अब कठघराबाट मुक्त गर्न सकिने छ ।’
उनको यो अभिव्यक्तिसँगै मेन्डीले राहतको लामो सास फेरेका थिए । यसै महिना म्यानचेस्टर सिटीसँगको सम्झौताको म्याद सकिएका मेन्डीले यसअघि युवती तथा केही किशोरीहरूसँग सम्बन्धित बलात्कार र यौन हिसासँग सम्बन्धित मुद्दामा पनि सफाइ पाएका थिए । न्यायाधीशहरूले बलात्कार र बलात्कार प्रयासका अझै दुई मुद्दाहरूमा अन्तिम फैसला दिन सकेनन् ।
उनीहरूले पुनः परीक्षणका लागि अनुमति दिए । मेन्डीमाथि अभियोजनकर्ताहरूले धेरै महिलालाई दुर्व्यवहार गर्ने उनको बानी परेको समेत दावी गरेका थिए । मेन्डीले सन् २०१८ मा फ्रान्ससँग फिफा विश्वकप उपाधि उचालेका थिए । त्यसो त युरोपियन फुटबलमा फुटबलहरूमाथि लाग्ने बलात्कार र यौन हिंसाका मेन्डी एक्ला साक्षी भने होइनन्।
उनीअघि पनि चर्चित अन्तरष्ट्रिय फुटबलरमाथि यौन हिंसाको आरोप लाग्ने गरेको छ। तर प्रमाणित भने खासै भएका छैनन् । रोनाल्डोदेखि नेमार तथा करिम बेन्जिमासम्मले यौन दुर्व्यवहारको मुद्दामा आरोप खेपेका छन् ।
