१० साउन, एजेन्सी ।
ग्रीसको जंगलमा केही दिनदेखि लागिरहेको आगो अनियन्त्रित बन्दै गएको छ । विश्व वन्यजन्तु कोष (डब्लुडब्लुएफ) ले ग्रीसमा गएको हप्ता मात्रै ३५ हजार हेक्टर वन तथा अन्य जमिन डढेलोका कारण प्रभावित भएको जनाएको छ । आगो फैलिएपछि नियन्त्रणको प्रयास भैरहेको छ । यसक्रममा आगलागी नियन्त्रण गर्न र आगो निभाउन प्रयोग भएको वायुसेनाको एउटा विमान दुर्घटना भएको छ ।
ग्रीसको रक्षा मन्त्रालयले विमानमा दुई जना पाइलट रहेको र दुवैको ज्यान गएको जनाएको छ । ग्रीसको फायर सर्भिसका प्रवक्ता यानिस एर्टोपियोसले दुर्घटना इभिया टापुमा भएको पुष्टि गरेको बीबीसीले जनाएको छ । सार्वजनिक भएको दुर्घटनाको भिडियोमा विमानले इभिया टापुमा पानी छर्किरहेको देखाएको छ। रुखको हाँगामा विमानको एक भाग ठोक्किएको देखिएको छ ।
त्यसको केही समयपछि विमान दुर्घटनामा परेको थियो । उच्च गर्मी र डढेलोको कारण ग्रीसमा जनजीवन प्रभावित भएको छ । तीव्र हावाको कारण जङ्गल र वरपरका बस्तीमा डढेलोको जोखिमपछि हजारौँलाई सुरक्षित ठाउँमा सारिएको छ । ग्रीसको रोड्स र कोर्फु टापुको जङ्गलमा लागेको डढेलोबाट हजारौँ स्थानीयबासिन्दा र पर्यटकलाई सुरक्षित ठाउँमा सारिएको हो ।
ग्रीसका प्रधानमन्त्री किरियाकोस मित्सोटाकिसले आफूहरु आगोको ज्वालासँग युद्धमा रहेकोे बताएका छन् । गत सातादेखि नै तीव्र हावासँगै जङ्गलको आगो अनियन्त्रित भएर फैलिरहेको छ । आगोबाट हुन सक्ने क्षति र जोखिमबाट जोगिन मानिसहरुले थातथलो छाडिरहेका छन् ।
आगो निभाउन पाँच वटा हेलिकप्टर र १ सय ७३ जना अग्नि नियन्त्रकसहितको टोली खटिएका छन् । यसबीच राजधानी एथेन्समा ४१ डिग्री सेल्सियस र मध्य ग्रीसमा ४४ डिग्री सेल्सियससम्म तापक्रम पुग्ने अनुमान गरिएको राष्ट्रिय मौसम पूर्वानुमानकर्ताले जनाएको छ ।
