ढाका,भदौ २१
नेपाली टिम फुटबल टिमका कप्तान विराज महर्जनले कीर्तिमान कायम गरेका छन् ।बंगलादेशमा जारी साफ सुजुकी कपको आज भएको भुटानसँगको खेलमा ८४ औं मिनेटमा दिनेश राजवंशीको स्थानमा मैदान प्रवेश गरेका उनले ६९ क्याप जित्दै नेपाली फुटबलमा कीर्तिमान कायम गरेका हुन् ।
पाकिस्तानसँगको खेलबाट विराजले राजुकाजी शाक्यले बनाएका ६८ क्यापको कीर्तिमान बराबरी गरेका थिए उनले भुटानसँगको खेलबाट राजुलाई उछिनेका हुन् ।
एन्फा एकेडेमीका दोस्रो ब्याजका खेलाडी रहेका विराज विभिन्न उमेर समूह पार गर्दै सन् २००८ सालमा राष्ट्रिय टिमबाट डेब्यु गरेका थिए । २००८ मा पोखरामा भएको पाकिस्तानविरुद्धको खेलमो ८९ औं मिनेटमा मैदानमा छिर्दै डेब्यु गरेका थिए ।
विराज महर्जन नेपाली फुटबलका सफल कप्तान हुन् । उनकै कप्तानीमा नेपालले ३ वटा महत्वपूर्ण प्रतियोगिताको उपाधि उचालेको छ । बंगबन्धु गोल्डकपको उपाधि दिलाएका विराजले सन् २०१६ मा साग गेम्समा नेपाललाई स्वर्ण पदक जिताएका थिए ।
२०१५ मा भारतमा सम्पन्न साफ च्याम्पियनसिपदेखि नेपालको कप्तानी सम्हालेका विराजले आफ्नै कप्तानीमा १५ खेल खेलेका छन् । नेपालले एएफ्सी सोलिडारिटी कपको उपाधि जित्दा पनि उनी कप्तानीकै भुमिकामा थिए ।
