१० भदौ,काठमाण्डौ ।
गठबन्धनको बलियो मतसहित प्रधानमन्त्री बनेका माओवादी केन्द्रका अध्यक्ष प्रचण्ड त्यही गठबन्धनले कोशी प्रदेशमा सरकार बन्न नसकेपछि राजसंस्थाको वकाल गरिरहेको राष्ट्रिय प्रजातन्त्र पार्टी राप्रपालाई फकाउन जुटेका छन् । गणतन्त्र नेपालमा लगातार राजसंस्थाको वकालत गरिरहेको राप्रपालाई संसदीय समितिको सभापति दिएर कोशी प्रदेशमा सरकार बनाउने रणनीतिमा गठबन्धन जुटेको छ ।
कोशी प्रदेशमा सभाध्यक्षको मतप्रयोग गरेर विश्वासको मत लिएपछि कांग्रेसबाट मुख्यमन्त्री बनेका उद्धव थापालाई सर्वाेच्च अदालतले संविधानसंवत मान्न नसकिने बताइसकेको छ । यस्तोमा अब १५ गते हुने पूर्ण सुनुवाईबाट गठबन्धनको सरकार ढल्न सक्ने र एमालेले सरकार बनाउन सक्ने संभावनाका बीच कोशीमा राप्रपालाई गठबन्धनमा फकाउन समिति सभापति दिन सत्तारुढ गठबन्धन तयार देखिएको देखिन्छ ।
सत्ता गठबन्धनले संसदीय समितिमा राप्रपालाई पनि भागबन्डा दिएर नै कोशी सरकार जोगाउने रणनीतिक बनाएका छन् । गठबन्धनका लागि कोशीमा ६ मतसहित राप्रपा निर्णयक छ । सत्ता गठबन्धनको सहमतिमा माओवादीले पाएको संसदीय समितिको सभापति राप्रपालाई दिएर कोशीमा बहुमत पु¥याउन राप्रपाका दीपक सिंहलाई पूर्वाधार विकास समितिको सभापति बनाउने भएको हो ।
यसै तयारीलाई मूर्तरूप दिन माओवादीको भागमा परेको पूर्वाधार विकास समितिको सभापतिको उम्मेदवारीबाट माओवादीका माधव सापकोटा फिर्ता भएका छन् । गठबन्धनले यस्तो गर्नुका पछाडि कोशीको सरकार टिकाउने स्वार्थ जोडिएको देखिएको छ । यसैले सापकोटाले उम्मेदवारीबाट पछाडि हट्दै सिंहको समर्थक आफैं बसेका हुन् ।
प्रतिनिधिसभामा रहेका १० सिटको नेकपा एस, १२ सिटको जसपा र ६ सिटको जनमतले पनि भागबन्डा पाउँदा राप्रपा छुटेको थियो । तर कोशीमा सरकारलाई विश्वासको मत प्राप्त हुनै सकस देखिएपछि राप्रपालाई पनि सत्तारुढ दलले फकाउने नीति लिएका हुन् । कोशीमा कांग्रेसबाट मुख्यमन्त्री भएका उद्धव थापालाई विश्वासको मत पाउनै सकस देखिएको छ ।
मात्रै एक भोटले विश्वासको मत नपाउने भएपछि सत्ता गठबन्धनले कोशीमा ६ सिट भएको राप्रपालाई फकाएका हुन् । अहिले कांग्रेसका मुख्यमन्त्रीलाई सहयोग जस्तो देखिए पनि केन्द्रमा पनि राप्रपासँग मिल्ने बाटो प्रधानमन्त्री प्रचण्डलाई देखिएको छ । किनकि जसपा र नेकपा एसले असन्तुष्टि राखे राप्रपालाई सरकारमा भित्र्याउने चेतावनी प्रधानमन्त्रीले दिँदै आएका छन् ।
कोशीमा ६ सिटको राप्रपाले सत्ता गठबन्धननलाई सहयोग गरे सहजै बहुमत पुग्छ । कांग्रेस सचेतक सुशीला थिङले पनि माओवादीको भागमा परेको समितिको सभापति राप्रपालाई दिएको बताइन् । कोशीमा राप्रपाले सरकारलाई सघाए उसलाई सभामुखसमेत दिने तयारी सत्ता गठबन्धनको रहेको बुझिएको छ ।
उता कोशीमा एमाले भने बहुमतको सरकार बनाउन सर्वाेच्चको आदेशको पर्खाइमा देखिन्छ । शुक्रबार मात्रै विराटनगर पुगेर एमाले अध्यक्ष केपी शर्मा ओेलीले ५० सिटको महतसहित कोशीमा सरकार बनाउने बताएका थिए । कोशीमा एमालेका ४० सदस्य रहेका छन् ।
