२४ भदौ, एजेन्सी ।
उत्तर कोरियाले परमाणु क्षमताको नयाँ पनडुब्बी सार्वजनिक गरेको छ । सर्वोच्च नेता किम जोङ उनको उपस्थितिमा गत शुक्रबार उत्तर कोरियाले आफ्नो परमाणु क्षमताको पनडुब्बी सिन्पो–सी क्लास समुद्रमुनि तैनाथ गरेको हो । सिन्पो–सी क्लास पनडुब्बी उत्तर कोरियाको आणविक हतियारमा सबैभन्दा नयाँ र सबैभन्दा शक्तिशालीमध्ये एक भएको बताइएको छ ।
रुसी पनडुब्बीको डिजाइनलाई परिमार्जित गर्दै यो पनडुब्बी बनाइएको हो । यसमा डिजेल इन्जिन प्रयोग गरिन्छ जसले ब्याट्रीहरू चार्ज गर्न सक्छ । यो पनडुब्बी आवश्यक पर्दा आवाज बिना पानीमुनि चल्न सक्छ । यो पनडुब्बीले १० वटा पुक्गुक्सङ–३ मिसाइलहरू पानीभित्रैबाट आक्रमण गर्न सक्छ । यो पनडुब्बीको विकासलाई उत्तर कोरियाको क्षमतामा ठूलो फड्को भनिएको छ ।
जमिनबाट प्रक्षेपण गरिएका लामो दूरीका क्षेप्यास्त्रहरू तुरुन्तै पत्ता लगाइन्छ र त्यसलाई एन्टिमिसाइलले असफल बनाउन सकिन्छ । तर, सिन्पो–सी क्लास पनडुब्बीबाट हानिएको क्षेप्यास्त्रलाई ट्र्याक गर्न गाह्रो हुनेछ । क्षेप्यास्त्र जति नजिक लक्ष्यमा पुग्छ, त्यति नै आक्रमण गर्न सहज हुन्छ । पनडुब्बीबाट हानिएको क्षेप्यास्त्र पानी मुनिमुनि नै लक्ष्य नजिक पुग्छ र त्यसले बाहिरै गएर पनि आक्रमण गर्न सक्छ ।
जसकारण यहाँबाट हानिएको क्षेप्यास्त्रलाई दुश्मनले प्रतिक्रिया दिन गाह्रो हुनेछ । यो कार्यले उत्तर कोरियाले अब आफ्नो क्षेप्यास्त्रयुक्त पनडुब्बी फ्लिटलाई आधुनिकीकरण र विस्तार गर्न चाहने स्पष्ट हुन्छ । पछिल्ला वर्षमा उत्तर कोरियाले पानीमुनि आक्रमण गर्न सक्ने ड्रोन, युद्धपोतसँगै मिसाइल पनडुब्बीसहितका नयाँ आणविक हतियारहरूले आफ्नो नौसेनालाई बलियो बनाउन खोजिरहेको छ ।
गत वर्ष उत्तर कोरियाले हेइल ड्रोन विकास गरेको थियो । यो ड्रोनले दुश्मनलाई पानीमुनि खोजीखोजी आक्रमण गर्नसक्छ । दक्षिण कोरियाली सेनाको २०२२ को तथ्यांकअनुसार कोरियाली नौसेनासँग ४७० युद्धपोत, मिसाइल गाइडेड जहाज, टार्पेडो र साना गस्ती जहाजहरू छन् । उत्तरसँग ७० पनडुब्बी छन्, जहाँ सोभियतकालीन रोमिया–क्लास भेसल र मिडगेट पनडुब्बी पनि समावेश छन् ।
यस्तै, उत्तरसँग युद्धपोतलाई समर्थन गर्ने ४० सैन्य जहाज र २५० ल्यान्डिङ क्राप्ट छन् । उत्तर कोरियाले दक्षिण कोरियामा जतिबेला पनि आक्रमण गर्ने सामर्थ्य राख्छ । तर, समुद्रमुनि हुने अभियानमा प्योङयाङ कमजोर भएको बताइन्छ । यस्तोमा उत्तर कोरियाको नयाँ पनडुब्बीले पानीमुनि हुने अभियानमा टेवा दिनेछ ।
