Nepal Times
Nepal Times
3
Shares

एसिया कप २०२३को पावर प्लेमा नेपाल सबैभन्दा उत्कृष्ट टोली

एसिया कप २०२३को पावर प्लेमा नेपाल सबैभन्दा उत्कृष्ट टोली

२ असोज,एजेन्सी ।
हालै सम्पन्न एसिया कप २०२३ को च्याम्पियन भारतविरुद्ध नेपाल पावर प्लेमा सबैभन्दा उत्कृष्ट क्रिकेट खेल्ने टोली बनेको छ । नेपालले आफ्नो इतिहासमै पहिलो पटक भारतसँग खेल्दा यस्तो रेकर्ड बनाएको हो । क्रिकेटको पावर हाउस पाकिस्तान र श्रीलंकाले भन्दा नेपालले भारतविरुद्ध धेरै राम्रो ब्याटिङ गरेको थियो ।

भारतविरुद्ध बंगलादेशपछि ठूलो योगफल बनाउने टोली नेपाल रह्यो । पावर प्लेमा भारतविरुद्ध नेपालले प्रतियोगिताकै उत्कृष्ट प्रदर्शन गर्यो । श्रीलंकाले फाइनलमा नेपालले पावर प्लेमा बनाएको रन जति पुरै टोलीले बनाउन सकेन । नेपालले श्रीलंकाको कान्डीमा भारतविरुद्ध टस हारेर पहिला ब्याटिङको निम्तो पाउँद ४८.२ ओभरमा २ सय ३० रनमा अल आउट भएको थियो ।

नेपालले पहिलो पावर प्ले अर्थात सुरुवाती १० ओभरमा ६५ रन बनाउँदा १ विकेट गुमाएको थियो । यस प्रतियोगितामा भारतविरुद्ध पावर प्लेमा कुनैपनि देशले बनाएको यो उच्च रन बन्यो । उता पाकिस्तान भारतले दिएको ३५७ रनको विशाल विजयी लक्ष्य पछ्याउनेक्रममा ३२ ओभरमा १२८ रनमा अल आउट भएको थियो ।

पाकिस्तानले सुरुवाती १० ओभरमा १ विकेट गुमाउँदै ४३ रन बनाएको थियो । सुपर फोरमै भारतले दिएको २१४ रनको विजयी लक्ष्य पछ्याएको श्रीलंका ४१.३ ओभरमा १ सय ७२ रनमा अल आउट भएको थियो । श्रीलंकाले सुरुवाती १० ओभरमा ३ विकेट गुमाउँदै ३९ रन बनाएको थियो । एसिया कपमा भारत बंगलादेशसँग ६ रनले पराजित हुन पुगेको थियो ।

जितको लागि २६६ रनको विजयी लक्ष्य पछ्याएको भारत २४९ रन बनाएको थियो । बंगलादेशले पावर प्लेमा भारतविरुद्ध १० ओभरमा ३ विकेट गुमाउँदै ४४ रन बनाएको थियो । उता फाइनलमा श्रीलंका भारतसँग ५० रनमा अल आउट भएको थियो । श्रीलंकाले सुरुवाती १० ओभरमा ३१ रन बनाउँदा ६ विकेट गुमाएको थियो ।

यसैबीच एसियाली क्रिकेट काउन्सिल (एसीसी) का अध्यक्ष जय शाहले श्रीलङ्काको क्रिकेट मैदानका कर्मचारीलाई ४२ लाख भारतीय रुपैयाँ दिने घोषणा गरेका छन् । भारतीय क्रिकेट कन्ट्रोल बोर्ड (बीसीसीआई) का सचिवसमेत रहेका एसीसीका अध्यक्ष जय शाहले ४२ लाख भारु नगद पुरस्कार दिने घोषणा गरेका हुन् ।

एसिया कप क्रिकेटका सबैजसो खेल वर्षाले प्रभावित हुँदा मैदानका कर्मचारीले उत्कृष्ट मेहनत गरेका थिए । पानी परेको बेला मैदानलाई ढाक्न, पानी रोकिएपछि मैदानबाट कभर हटाउन र मैदान पुनः सुक्खा बनाएर खेलका लागि योग्य बनाउन गरेको मेहनतको चौतर्फी प्रशंसा भइरहेको छ ।

भारतका बलर मोहम्मद सिराजले पनि फाइनल खेलमा ’प्लेअर अफ दी म्याच’ बापत पाएको पुरस्कार मैदानका कर्मचारीलाई दिने घोषणा गरेका छन् । भारतीय खेलाडी रोहित शर्मा र विराट कोहलीले पनि उनीहरूको मेहनतको तारिफ गरेका छन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.