२५ असोज,काठमाण्डौ ।
युद्धरत इजरायलमा रहेका नेपाली विद्यार्थीहरूलाई उद्धार गरी स्वदेश ल्याउने तयारी गरिएको छ। तेल–अविवस्थित बेन गुरिन विमानस्थलमा अवतरण गरेको नेपाल वायुसेवा निगमको जहाजमा विद्यार्थीहरू चढेका छन्। बिहीबार २५१ जना नेपाली स्वदेश फर्किन लागेका छन्। घाइते ३ विद्यार्थी भने इजरायलस्थित स्थानीय अस्पतालमा उपचाररत छन्।
शनिबार हमासले गरेको आक्रमणपछि सम्पर्कविहीन कञ्चनपुरका विपीन जोशी अझै भेटिएका छैनन्। आक्रमणमा १० नेपालीले ज्यान गुमाएका थिए। उनीहरुको शव भने आज ल्याइने छैन् । आजै मध्यान्न परराष्ट्रमन्त्री एनपी साउदसहितको उद्धार टोली त्यहाँ अवतरण गरेको थियो। क्याप्टेन श्रवण रिजाल नेतृत्वको क्र्यू मेम्बरले उद्धार उडान भरेका हुन् ।
मन्त्री साउदले नेपाली दूतावासका कर्मचारी साथै इजरायली अधिकारीसँग कुराकानीसमेत गरेका थिए । जहाज बिहीबार राति सवा ९ बजे काठमाडौंस्थित त्रिभुवन अन्तर्राष्ट्रिय विमानस्थलमा अवतरण गर्ने परराष्ट्र मन्त्रालयले जनाएको छ। विद्यार्थीहरू जहाजमा चढेको फोटो÷भिडिओहरू सामाजिक सञ्जालमा देखिएका छन्।
जहाजमा चढेपछि एक विद्यार्थी प्रमोद केसीले आफूहरूलाई भगवान्ले अर्को जुनी दिएर रणभूमिबाट फर्किएर आउन सफल भएको बताएका छन्। उनले आफूसँगै आएका केही साथीहरू गुमाउनुपर्दा कलिला मुनाहरू पलाउन नपाउँदै अस्ताएको भन्दै दुःख व्यक्त गरेका छन्।
उनले लेखेका छन, खै कसरी सम्झिऊँ ती घटनाहरू, मन नै थामिँदैन। कुन सपना÷आशा लिएर आएका ती कलिला मुनाहरु पलाउन नपाउँदै अस्ताए। भगवान् दाहिने रहेछन् र युद्धको त्यो रनभूमिबाट फर्केर आउन सफल भएँ। सँगै सपना बोकी गएका ती मुनाहरु अब रहेनन्। भगवान्ले अर्को जुनी दिनुभएको छ। यो जुनिको हिस्सा बनिदिनुभएकोमा दाइ विकल्प शाही, बोस गिलाद अन्य दाइदिदीहरूमा धेरै धेरै धन्यवाद। र मेरो सफल जिन्दगीको लागि प्रार्थना गर्ने सम्पूर्णलाइ नमन। अहिले हामी इजरायलबाट नेपालका लागि जहाज चढिसकेका छौँ।
