१२ मंसिर, काठमाण्डौ ।
दक्षिण अफ्रिकाको एक प्लाटिनम खानीमा भएको दुर्घटनामा ११ जनाको मृत्यु भएको छ । राजधानी प्रिटोरियाबाट पश्चिममा पर्ने रुस्टेनबर्ग खानीमा सोमबार दुर्घटना हुँदा ११ जनाको मृत्यु भएको र ७५ जना घाइते भएको समाचार एजेन्सी रोयटर्सले जनाएको छ । घाइतेहरुलाई चार अलग–अलग अस्पतालमा भर्ना गरिएको छ ।
खानीमा दुर्घटनाको बखत ८६ जना मजदुरहरुले काम गरिरहेका थिए । दुर्घटनापछि खानीमा उत्खननको काम स्थगित गरिएको छ । खानी सन्चालन गर्ने कम्पनी इम्पाला प्लाटिनमका सीईओ निको मुलरले विज्ञप्ति जारी गरेर यो घटनालाई इतिहासकै सबैभन्दा दुःखद भनेका छन् ।
इम्पाला, विश्वमै पुरानो र गहिरो खानीमा उत्खनन गर्ने कम्पनीको रुपमा प्रख्यात मानिन्छ । दक्षिण अफ्रिकामा यस वर्ष सेप्टेम्बर महिनासम्म खानीमा २७ वटा ठूला दुर्घटना भएका छन् । सन् २०२२ मा खानी दुर्घटनामा ४९ जनाको मृत्यु भएको थियो । यो तथ्यांक अनुसार अघिल्लो वर्षको तुलनामा यो वर्ष सुरक्षित मानिएको रोयटर्सले जनाएको छ ।
यता भारतको उत्तरकाशी सुरुङ दुर्घटनामा १६ दिन अघि दृखि फसेका ४१ मजदुरको उद्धार गरिएको छ । सुरुङमा फसेका ४१ जना मजदुरलाई आज मध्यान्नदेखि सुरक्षित रुपमा बाहिर निकालिदैछ । उद्धाकार्य केही समयसम्म चल्ने भारतीय संचारमाध्यामहरुले जनाएका छन् ।
उद्धारपछि उनीहरुलाई केही समय खानीमै राखेर अस्पताल लगिने छ। लामो समयको उद्धार प्रयासपछि मंगलबार सुरुङमा ब्रेक थ्रु भएको थियो र एस्केप टनेलबाट कामदारलाई बाहिर निकाल्न एस्केप टनेल निर्माण गरिएको थियो ।
उत्तरकाशीको सिल्क्यरा सुरुङमा फसेका ४१ जना मजदुरहरुलाई पहाड भत्काएर उद्धार गरिएको हो । १२ नोभेम्बरमा ४१ मजदुर खानीमा फसेका थिए । त्यसको केही दिनपछि उनीहरुका लागि खाना भने भित्र पुर्याइएपनि बाहिर निकाल्ने प्रयास भने सफल हुन् सकेको थिएन ।
