१६ मंसिर,एजेन्सी ।
पोर्चुगिज भेट्रान फरवार्ड क्रिष्टियानो रोनाल्डो सम्मिलित अल नासरले साउदी प्रो लिगमा लज्जास्पद हार बेहोरेको छ । अल नासर अल हिलालसँग ३–० गोलले पराजित भएको हो । किङ फाद इन्टरनेसनल स्टेडियम रियादमा गएराति भएको खेलमा जितसँगै अल हिलाल २२ खेलमा अपराजित छ ।
अल हिलालका एलेक्सान्दर मित्रोभिचले दुई तथा सेर्गेज मिलिन्कोभिक सभिकले एक गोल गरे । सबै तीन गोल दोस्रो हाफमा भएका थिए । अल नासरले लिगमा तेस्रो हार ब्यहोरेको छ । उता गएको अगस्टमा अरब क्लब च्याम्पियन्स कपमा अल नासरसँगै २–१ ले पराजित भएयता अल हिलालले हार बेहोरेको छैन ।
जसमा १९ जित र ३ बराबरीको नतिजा छ । गएरातीको खेलमा अल नासरले बल पोसेसन राखेपनि फिनिसिङमा चुक्दा लिगमा तेस्रो हार बेहोर्न पुग्यो । यता, अल हिलालले भने पाएको मौकालाई सदुपयोग गर्दै लिगमा अपराजित रहन सफल भयो ।
अल हिलालसँगको हारसँगै अल नासरको २१औं खेलमा अपराजित यात्रामा पूर्णविराम लागेको छ ।गत १९ अगस्टमा प्रो लिगमा अल तावनसँग २–० ले पराजित भएयता अल नासर अपराजित रहेको थियो । जसमा १८ जित र २ बराबरीको नतिजा छ ।
यस जितसँगै अल हिलालले आफ्नो शीर्षतालाई थप मजवुत बनाएको छ । अपराजित रहेको अल हिलाल १५ खेलबाट १३ जित र २ बराबरीसहित ४१ अंक जोडेर शीर्षस्थानमा छ । अल हिलालले दोस्रो स्थानको अल नासरलाई ७ अंकले पछि पारिसकेको छ ।
अल नासर १५ खेलबाट ११ जित, १ बराबरी र ३ हारबाट ३४ अंक जोडेर दोस्रो स्थानमा रहेको छ । अल हिलालसँगको हारले अल नासरले अंक दुरी छोट्याउने मौका गुमाएको छ ।
