२१ मंसिर,एजेन्सी ।
ब्राजिलियन सिरी ‘ए’को क्लब सान्तोस रेलिगेसनमा परेको छ । महान् खेलाडी पेलेको पूर्वक्लब समेत रहेको सान्तोस १११ वर्षे लामो इतिहासमा पहिलोपटक रेलिगेसनमा परेको हो । बुधबार ब्राजिलको शीर्ष लिग सिरी ‘ए’को अन्तिम चरणको खेलमा फोर्टालेजासँग २–१ ले पराजित भएपछि विश्व फुटबलमा पेले, नेयमारसँगै अरू चर्चित खेलाडी दिएको सान्तोस रेलिगेसनमा परेको हो ।
यसअघि, सान्तोस ब्राजिलको शीर्ष डिभिजन लिगबाट घटुवा नहुने क्लबहरू साओ पाउलो र फ्लेमिंगोसँगै तेस्रो टिम थियो । तर, लिगका पछिल्ला पाँच खेलमा जितविहीन बनेपछि सान्तोस ४३ अंकसहित १७औँ स्थानमा सीमित बनेको हो । ब्राजिलियन सिरी ‘ए’बाट सान्तोससँगै गोइएस, कोरिटिबा र अमेरिका–एमजी रेलिगेसनमा परेका छन् ।
ब्राजिलियन स्टार पेलेले आफ्नो क्लब करियर नै सान्तोसमा बिताएका थिए । सन् १९५० देखि ६० सम्मको अवधिमा सान्तोसले चारपटक ब्राजिलियन लिग र १० पल्ट स्टेट लिगको उपाधि जितेको थियो । यस्तै, क्लबले सन् १९६२ र १९६३ को कोपा लिबेरटाडोरेस र इन्टरकन्टिनेन्टल कपको पनि उपाधि जितेको थियो । पेलेबाहेक, रोबिन्हो, नेइमार र रोड्रिगो पनि सान्तोसकै उत्पादन हुन् ।
