Nepal Times
Nepal Times
189
Shares

एनसेलविरुद्ध अमरेशको रिटमा आज सुनुवाइ

एनसेलविरुद्ध अमरेशको रिटमा आज सुनुवाइ

२६ मंसिर,काठमाण्डौ ।
दूरसंचार सेवा प्रदायक एनसेलविरुद्ध सांसद डा. अमरेशकुमार सिंहले सर्वोच्च अदालतमा दायर गरेको रिटमा आज सुनुवाइ हुने भएको छ । सांसद सिंहले रिट निवेदनमा नेपालको कानुनी प्रक्रिया छलेर राज्यलाई हानि पुग्ने गरी अपारदर्शी तवरमा एनसेलको सेयर खरिद–बिक्री भएको दाबी गरेका छन् ।

उनले सेयर खरिदबिक्रीको कारोबारलाई मान्यता नदिन पनि माग गरेका छन् । शुक्रबार दायर उक्त रिट निवेदनमाथि सुनुवाइका लागि आइतबार र सोमबार दुबै दिन पेसी तोकिए पनि ‘हेर्न नभ्याइने’ सूचीमा परेको थियो। यसैबीच सेयर खरिद बिक्री सम्बन्धीका कागजात एनसेलले नेपाल दूरसञ्चार प्राधिकरणलाई उपलब्ध नगराएपछि फेरि ताकेता गरेको छ ।

११ दिन अगाडि आजियटाले एनसेलमा रहेको आफ्नो ८० प्रतिशत सेयर नेपाली मूलका व्यवसायीको बेलायतमा रहेको स्पेक्ट्रलाइट यूकेलाई बिक्री गरेको थियो । सेयर खरिद बिक्री गर्दा प्राधिकरणबाट पूर्व स्वीकृति लिनुपर्ने कानुनी प्रावधान उल्लंघन गरेको भन्दै तत्काल कागजात उपलब्ध गराउन प्राधिकरणले निर्देशन दिएको थियो ।

तर अहिलेसम्म पनि सेयर खरिद बिक्रीको सम्पूर्ण कागजात प्राधिकरणले प्राप्त गरेको छैन । दुई सातासम्म पनि कागजात प्राप्त नभएपछि एनसेललाई फेरि पत्र लेखेर कागजात उपलब्ध गराउन भनेको प्राधिकरणले जनाएको छ । प्राधिकरणले सोमबार पत्र लेखेर एनसेललाई पठाएको जनाएको छ ।

मंसिर १३ गते मलेसियन कम्पनी आजियटाले नेपालमा लगानीको वातावरण नभएको कारण देखाउँदै एनसेलमा रहेको आफ्नो ८० प्रतिशत सेयर बिक्री गर्ने घोषणा गरेको थियो । त्यसको दुई दिनपछि नेपाली मूलका व्यवसायी शतिशलाल आचार्यको बेलायती कम्पनी स्पेक्ट्रलाइट यूकेले सम्पूर्ण सेयर खरिद गरेको जानकारी आजियटाले दिएको थियो ।

एनसेलको सेयर खरिद बिक्री प्रक्रियामा चलखेल भएको हुन् सक्ने भन्दै सरकारले छानबिन समिति बनाएको छ भने संसद्का तीनवटा समितिले चासो राखेका छन् । उनीहरुले पनि यस विषयमा छलफल गराएका छन् । सरकारले पूर्वमहालेखा परीक्षक टंकमणि शर्माको संयोजकत्वमा छानबिन समिति बनाएको हो । समितिले छानबिनको काम थालिसकेको जनाएको छ ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.