Nepal Times
Nepal Times
1.64k
Shares

कुवेती राजाको निधनमा भारतले राष्ट्रिय झण्डा झुकाउने

कुवेती राजाको निधनमा भारतले राष्ट्रिय झण्डा झुकाउने

१ पुस ,एजेन्सी ।

कुवेतका अमिर शेख नवाफ अल–अहमद अल–जाबेर अल–सबाहको निधनपछि भारत सरकारले आइतबार एक दिवसीय राजकीय शोक मनाउने घोषणा गरेको छ । आमिरको ८६ वर्षको उमेरमा शनिबार निधन भएको हो । भारतको केन्द्रीय गृह मन्त्रालयले सबै राज्यहरूलाई पठाएको सन्देशमा डिसेम्बर १७ मा राज्य शोकमा भारतभर राष्ट्रिय झण्डा आधा झुकाइने र कुनै आधिकारिक मनोरञ्जन कार्यक्रम नहुने बताएको छ।

यसमा भनिएको छ, ‘कुवेतका अमिर शेख नवाफ अल –अहमद अल–जाबेर अल–सबाहको डिसेम्बर १६, २०२३ मा निधन भयो।’ ’मृतकको सम्मानको प्रतीकको रूपमा, भारत सरकारले डिसेम्बर १७ मा एक दिनको राजकीय शोक गर्ने निर्णय गरेको छ।’

‘शोकको दिन, भारतका सबै भवनहरूमा राष्ट्रिय झण्डा आधा झुकाइनेछ जहाँ नियमित रूपमा राष्ट्रिय झण्डा फहराइन्छ र त्यस दिन कुनै आधिकारिक मनोरञ्जन कार्यक्रम हुनेछैन,’ विज्ञप्तिमा भनिएको छ । प्रधानमन्त्री नरेन्द्र मोदीले कुवेतका शासक अमिर शेख नवाफ अल अहमद अल जाबेर अल सबाहको निधनमा शोक व्यक्त गरेका छन।

मोदीले सामाजिक सञ्जाल एक्समा भनेका छन, ’शेख नवाफ अल अहमद अल जाबेर अल सबाहको निधनको बारेमा थाहा पाउँदा गहिरो दुःख लाग्यो । हामी शाही परिवार र कुवेतका जनताप्रति गहिरो समवेदना व्यक्त गर्दछौं।’ कुवेतको शाही अदालतले उनको निधन भएको सार्वजनिक गरेपनि निधनको कारण भने खुलाएको छैन ।

रोयटर्सका अनुसार नवाफ गत महिना अस्पताल भर्ना भएका थिए । त्यतिबेला उनको स्वास्थ्यमा अकास्मात् समस्या आएको भन्दै अस्पताल लगिएपनि उनको स्वास्थ्य स्थिर रहेको भनिएको थियो । उनको निधनपछि ८३ वर्षीय शेख मेशाल अल अहमद अल सबाहलाई नवाफको उत्तराधिकारी घोषणा गरिएको छ ।

तीन वर्षयता कुवेतको शक्तिमा आएका नवाफ उमेरले कमजोर बन्दै गएपछि सन् २०२२ देखि शेख मेशालले नै त्यहाँको शासन सञ्चालन गर्दै आएका थिए । शेख नवाफको निधनपछि शनिबार औपचारिक रूपमा शेख मेशाललाई उत्तराधिकारी घोषणा गरिएको हो । कुवेतको संविधानमा उत्तराधिकारी स्वतः अमिर बन्ने व्यवस्था छ ।

तर, संसदबाट शपथ लिएपछि मात्र सत्ता ग्रहण गर्न सक्नेछन् । नवनियुक्त अमिरले एक वर्षपछि आफ्नो उत्तराधिकारी तोक्न सक्नेछ । शेख नवाफ उनका दाइ शेख सबाहको निधनपछि सन् २०२० मा कुवेतको अमिर बनेका थिए । शेख सबाह एक दशकभन्दा बढी कुवेतको शासनसत्ताा रहे । उनले नै छिमेकी र अमेरिका लगायतका देशहरूसँगको सम्बन्ध सन्तुलित बनाएका थिए ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.