९ पुष , विराटनगर ।
नेपाली राष्ट्रिय क्रिकेट टोलीका ओपनिङ ब्याटर कुशल भुर्तेल अष्ट्रेलियामा सम्मानित भएका छन् । व्यवसायिक क्रिकेट खेल्न अष्ट्रेलिया पुगेका भुर्तेललाई एनआरएनए (एनएसडब्लु) राज्य समितिले सम्मान गरेको हो । एनआरएनए एनएसडब्लु राज्य समिति र असल्याण्डले संयुक्त रूपमा शनिबार सिड्नीमा आयोजना गरेको कार्यक्रममा क्रिकेटर भुर्तेललाई सम्मान गरिएको हो ।
भुर्तेललाई सिड्नीमा स्वागत गर्दै एनआरएनए उपाध्यक्ष तथा एनएसडब्लु राज्य समितिका संयोजक विनोद कुँवरले देशलाई विश्वमाझ चिनाउने खेलाडीलाई सम्मान गर्न पाउनु गर्वको कुरा रहेको बताए । खेलाडीलाई धेरथोर सहयोग होस् भनेर सम्मान गर्ने गरेको अध्यक्ष कुँवरले बताए ।
सिड्नी आउने हरेक नेपाली राष्ट्रिय खेलाडीलाई जहिले पनि यही तहमा सम्मान गर्ने घोषणासमेत गरे । रूपन्देहीमा निजी लगानीबाट एक्ट्राट्रेक ओभल अन्तर्राष्ट्रिय क्रिकेट रंगशाला बनाइरहेका कुँवरले आगामी फागुन भित्रमा आफ्नो मैदानमा खेल खेल्न मिल्ने जानकारीसमेत गराए ।
उनले कुनै पनि राष्ट्रिय खेलाडीलाई जीवन चलाउन देश छोड्नु नपरोस् भनेर आफूले त्यसका लागि सकेको सहयोग गर्ने बाचासमेत गरे । सो क्रममा कुशल भुर्तेलले पनि आफु क्रिकेटमा नलागेको भए अष्ट्रेलियामा विधार्थी हुने सोचमा रहेको बताएका छन् । सिड्नीमा आयोजना गरिएको कार्यक्रममा कुशललाई नगद सहित सम्मान गरिएको हो ।
खेलाडी पलायनको विषयमा सोधिएको प्रश्नमा कुशलले भने , ‘अब क्रिकेट खेलेर जीवनयापन गर्न सक्ने दिन आइसकेको छ । हिजोको दिनमा अष्ट्रेलिया आउने मेरो सोच पनि थियो । तर अहिले क्रिकेटले जीवनमा फरक मोडमा ल्याइदिएको छ ।’ कुशल भुर्तेल अहिले अस्ट्रेलियामा छन् । अस्ट्रेलियाको भिक्टोरिया राज्यको फ्रान्कस्टोन पेनिन्सुला क्रिकेट क्लबमा आबद्ध भएर क्रिकेट खेल्न भुर्तेल अस्ट्रेलिया आएका हुन् ।
करिब २ महिना अस्ट्रेलिया बसाईमा उनले अनुभव बटुल्नुका साथै क्लबबाट खेल्दा आफ्नो खेल कौशल अझ बलियो हुने आशा राखे ।उनले जनवरीको अन्त्यसम्म क्लबबाट खेल्नेछन् । त्यसपछि उनी राष्ट्रिय टिमबाट खेल्नका लागि नेपाल फर्कनेछन् ।
फ्रान्कस्टोन अस्ट्रेलियाको भिक्टोरिया राज्यको शीर्ष क्लब मध्ये एक हो । क्लबले भिक्टोरियाको शीर्ष प्रतियोगिता खेलिरहेको छ । यही क्लबबाट अस्ट्रेलियाका टेस्ट क्रिकेटर स्कट बोलान्डको ’होम क्लब’ हो । क्लबमा रहँदा कुशलले एकदिवसीय र टी–२० खेलमा सहभागिता जनाउनेछन्। क्लबले भिक्टोरिया प्रिमियर क्रिकेटअन्तर्गतका विभिन्न राज्यस्तरीय प्रतियोगिता खेलिरहेको छ ।
