Nepal Times
Nepal Times
1.04k
Shares

पाकिस्तानले लियो बदला, इरानमा आक्रमण

पाकिस्तानले लियो बदला, इरानमा आक्रमण

४ माघ ,एजेन्सी ।

बलुचिस्तानमा इरानले आक्रमण गरेको दुई दिनपछि पाकिस्तानले पनि इरानमा आक्रमण गरेको दाबी गरेको छ । पाकिस्तानको विदेश मन्त्रालयका प्रवक्ताले एक विज्ञप्ति जारी गर्दै इरानमा आक्रमण गरेको जानकारी दिएका छन् । पाकिस्तानी सेनाले इरानमा आश्रय लिएका पाकिस्तानी मूलका आतंकवादीलाई निशाना बनाएको उनले उल्लेख गरेका छन् ।

विज्ञप्तिमा भनिएको छ, ’आज बिहान पाकिस्तानले इरानको सिस्तान–ओ–बलुचिस्तान प्रान्तमा आतंकवादीहरूमाथि आक्रमण ग¥यो । गुप्तचर सूचनाका आधारमा गरिएको कारबाहीमा धेरै आतंककारी मारिएका छन् ।’ पाकिस्तानी विदेश मन्त्रालयले अगाडि भनेको छ, ’पाकिस्तान हरेक खतराबाट आफ्नो राष्ट्रिय सुरक्षाको रक्षा गर्न प्रतिबद्ध छ । पाकिस्तानले भविष्यमा पनि आफ्नो सुरक्षाका लागि यस्ता कदमहरू जारी राख्नेछ ।’

यसअघि पाकिस्तानले आफ्नो बलोचिस्तान प्रान्तमा दुईजना बालबालिकाको ज्यान जाने गरी क्षेप्यास्त्र हमला गरेको भन्दै आक्रोश व्यक्त गर्दै इरानको निन्दा गरेको थियो । इस्लामावादस्थित विदेश मन्त्रालयले आफ्नो हवाई सीमाको ‘पूर्णतः अस्वीकार्य उल्लङ्घन’ गरिएको भन्दै त्यसको सम्भावित ‘गम्भीर परिणाम बेहोर्नुपर्ने’ चेतावनी पनि दिएको थियो ।

इरानको सरकारी सञ्चार माध्यमले भने पाकिस्तानमा रहेको एक उग्रवादी समूह जैश अल अदलका अखडाहरूमा हमला गर्न ड्रोन र मिसाइलहरूको प्रयोग गरिएको जनाएको थियो । उता अमेरिकाले पनि पाकिस्तानको बलुचिस्तानमा इरानले गरेको आक्रमणको निन्दा गर्दै पछिल्ला केही दिनमा यस देशले आफ्ना तीन छिमेकी देशको सीमा उल्लंघन गरेको बताएको थियो ।

अमेरिकी विदेश मन्त्रालयका प्रवक्ता म्याथ्यु मिलरले पाकिस्तान, सिरिया र इराकमा इरानको आक्रमण चिन्ताजनक रहेको बताएका थिए । पाकिस्तान र इरानबीचको सम्बन्धमा तिक्तता बढेका बेला चीनले भने दुवै देशलाई संयमता अपनाउन अपिल गरेको थियो । इरानले गरेको आक्रमणमा दुई बालबालिकाको मृत्यु भएको पाकिस्तानले जनाएको छ ।

आक्रमणप्रति विरोध जनाउँदै पाकिस्तानले इरानबाट राजदूत फिर्ता बोलाएको थियो । लगत्तै उसले इरानमा जवाफी हमला गरेको हो । यता बलुचिस्तानमा इरानले गरेको आक्रमणका विषयमा भारतले पनि आफ्नो धारणा सार्वजनिक गरेको छ ।

भारतीय विदेश मन्त्रालयका प्रवक्ता रणधीर जैसवालले सोसल मिडिया प्लेटफर्म एक्समा भारतको अडान जानकारी गराएका हुन् । उनले लेखेका छन्, ‘यो इरान र पाकिस्तानको आपसी मामिला हो । जहाँसम्म भारतको सवाल छ, आतंकवादप्रति हाम्रो नीति शून्य सहनशीलताको छ । हामी विश्वास गर्छौं कि देशहरूले आत्मरक्षामा यस्तो कदम चाल्न सक्छन्।’

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.