११ माघ ,काठमाडौं ।
सहकारी र ग्यालेक्सी टेलिभिजनको शेयर प्रकरणमा विभिन्न प्रश्नको घेरा भित्र रहेका राष्ट्रिय स्वतन्त्र पार्टीका सभापति रवि लामिछानेले देश बनाउनका लागि व्यवस्थाका केही हाइज्याकरहरूलाई हराउने आँट गर्नुपर्ने बताएका छन् । संविधानले परिकल्पना गरेको समाजका लागि, आवश्यक कानून बनाउन सिङ्गो संसदले सर्वदलीय प्रतिवद्धता गरेको दिन देश सुमार्गमा हिँड्न शुरू हुने उनको भनाइ छ ।
उनले सामाजिक संजाल फेसबुकमा लेखेका छन्, ‘राज्यका निकायहरूलाई स्वतन्त्रतापूर्वक काम गर्न दिने सर्वदलीय सहमति गरेको दिनदेखि देश बन्न शुरू हुन्छ । संविधानले परिकल्पना गरेको समाजका लागि, आवश्यक कानून बनाउन सिङ्गो संसदले सर्वदलीय प्रतिवद्धता गरेको दिन देश सुमार्गमा हिँड्न शुरू हुन्छ ।
त्यसपछि मिडिया÷सोसल मिडियामा कसैलाई फसाउन वा बचाउन कोही दिनरात नाङ्गो भइरहनु पर्दैन । आफूमाथि प्रश्न उठ्दा आँखा जुधाएर सामना गर्ने हिम्मत आफै गरौं, तलबी सेना अफ बिटमा ननचाऔं । फेस गरौं, फेस नलुकाऔं ।’ उनले स्वाद र सुविधाअनुसार गलत ज्ञान पेलेको पेल्यै नगर्न आग्रह गर्दै देश बन्ने उल्लेख गरेका छन् ।
‘व्यवस्थाका केही हाइज्याकरहरूलाई चुनावबाट हराउन आँट गरेमात्र पुग्छ । नागरिकका अधिकार बीचमा बसेर लुट्ने र हाइज्याकरको रक्षाका लागि दिनरात खट्ने ८÷१० थान मतियार (न्यारेटिभ सेटर) हरूले लामो छुट्टी लिए, सामाजिक सञ्जालपनि अझ इन्ट्रेस्टिङ बन्थ्यो’ उनले भनेका छन्, ‘अन्त्यमा, देश बन्छ तर कहिले बन्छ त भन्दा, हाइज्याकरहरुको अन्त्य चुनावबाट गरेपछि मात्रै बन्छ । चुनाव कहिले ?? ८४ मा ।’
राष्ट्रिय सभाका १९ सदस्यका लागि आज मतदानको दिन रविले ८४ लाई जोडेर आइज्याकरहरुलाई हराउन आग्रह गरेका छन् । रवि पछिल्लो समय सहकारी र टेलिभिजनको शेयर प्रकरणमा कम्पनी रजिष्ट्रार कार्यालयलाई झुक्याएको खुलेपछि प्रश्नको घेरामा छन् । उनीविरुद्ध सभामुख र राज्यव्यवस्था समिति सहित सहकारी विभागमा समेत उजुरी परेको छ ।
