Nepal Times
Nepal Times
3
Shares

चुनावको मुखमा इमरान खानलाई १० वर्षको जेल,के हो आरोप ?

चुनावको मुखमा इमरान खानलाई १० वर्षको जेल,के हो आरोप ?

१६ माघ , एजेन्सी ।
पाकिस्तानका पूर्वप्रधानमन्त्री इमरान खान र पूर्वविदेशमन्त्री शाह नहमुद कुरेशीलाई राज्यका गोप्य विषय चुहाएको अभियोगमा १० वर्षको जेल सजाय सुनाइएको छ । त्यहाँको विशेष अदालतले उनीहरूलाई मंगलवार १०–१० वर्षको सजाय तोकेको हो ।

उनीहरूमाथि कूटनीतिक पत्राचार चुहावट गरेको अभियोग लागेको अन्तराष्ट्रिय संचारमाध्यामहरुले उल्लेख गरेका छन् । उक्त मुद्दा अमेरिका र पाकिस्तानबीचको कूटनीतिक दस्तावेजसँग सम्बन्धित रहेको बताइएको छ ।

ती दस्तावेजहरू आदानप्रदान हुँदा खान पाकिस्तानका प्रधानमन्त्री थिए । खानले आफूविरुद्ध लगाइएको आरोप अस्वीकार गर्दै आएका छन् । आफूले सरकारमा रहँदा सुधारका काम गरेको र ती काम ध्वस्त पार्न अमेरिकाले आफूविरुद्ध षड्यन्त्र गरेको आरोप उनको छ ।

इमरान खानले यो सजायलाई उच्च अदालतमा चुनौती दिन सक्ने भए पनि सेनासँगको तनावका कारण उनलाई राहत पाउने आशा कमै छ । सुनुवाइका क्रममा न्यायाधीशले इमरान खानका वकिलहरू उपस्थित नभएको र उनलाई सरकारी वकिल दिइएको बताएका छन् ।

पूर्व विदेशमन्त्री कुरैशीले आफ्ना वकिल उपस्थित नभएको अवस्थामा कसरी बयान लिने भन्ने प्रश्न गरेका छन् । यो सुनुवाइ जेलभित्रै भएको थियो । चुनावअघि इमरान खानको चुनाव चिन्ह ब्याट पनि उनको पार्टीबाट खोसिएको थियो ।

खान यसअघि पनि भ्रष्टाचारको आरोपमा दोषी ठहर भएका थिए । उनी तीन वर्षको जेल सजाय भोगिरहेका थिए । अब थप सात वर्ष थपिएको छ । फेब्रुअरी ८ मा पाकिस्तानमा निर्वाचन हुँदैछ ।

उनलाई यो निर्वाचनमा उम्मेदवार हुन दिइएको छैन । खान क्रिकेटबाट राजनीतिमा आएका हुन् । उनको नेतृत्वमा पाकिस्तानले सुन् १९९२ मा एकदिवसीय विश्वकपको उपाधि जितेको थियो । त्यो पाकिस्तानले जितेको एकमात्र एकदिवसीय विश्वकप हो ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.