Nepal Times
Nepal Times
3
Shares

अनिल साह र भीम सार्कीले नयाँ इतिहास कोरे

अनिल साह र भीम सार्कीले नयाँ इतिहास कोरे

२९ माघ ,  काठमाण्डौ । 

क्यानडाविरुद्धको तीन खेलको ओडीआई सिरिज नेपालले क्लीनस्वीप गरेको छ। सोमबार भएको अन्तिम खेलमा क्यानडालाई ९ विकेटले हराउँदै तीन वटै खेलमा जित हासिल गरेको हो।

क्यानडाविरुद्धको खेलमा नेपालको एकदिवसीय इतिहासमै पहिलो पटक नेपालका २ जना ब्याटरले एउटै इनिङमा शतक बनाएका छन् । तेस्रो एकदिवसीयमा नेपालका अनिल साह र भिम सार्कीले शतक बनाएका हुन् ।

यसअघि नेपालका लागि कुनै पनि खेलमा दुई खेलाडीले एउटै इनिङमा शतक बनाएका थिएनन् । आजको शतक दुवै नेपाली ब्याटरको एकदिवसीय करिअरको पहिलो शतक हो ।

यसअघि नेपालका लागि पारस खड्का, रोहित पौडेल, दिपेन्द्र सिंह ऐरी, कुशल भुर्तेल, आसिफ शेख र कुशल मल्लले एकदिवसीय क्रिकेटमा शतक बनाएका छन् । क्यानडाले दिएको २३३ रनको लक्ष्य नेपालले ४४.३ ओभरमा १ विकेट गुमाएर भेट्टायो।

नेपालका लागि अनिल शाह र भीम शार्की दुवैले शतकीय पारी खेले। अनिलले १२४ बलमा १२ चौका र २ छक्का प्रहार गर्दै ११२ रन बनाए। उनी अघिल्लो खेलमा १९ बलमा अर्धशतक प्रहार गर्दै नेपालका लागि ओडीआईमा सबैभन्दा छिटो अर्धशतक बनाउने खेलाडी बनेका थिए।

यस्तै भीमले १२९ बलमा ११ चौका र १ छक्का प्रहार गर्दै १०१ रन बनाए। ४५ रन बनाउँदा पहिलो विकेटको रुपमा कुशल भुर्तेललाई गुमाएको नेपालका लागि अनिल र भीमले कीर्तिमानी साझेदारी गरे। उनीहरुले दोस्रो विकेटका लागि १८९ रनको साझेदारी गरे। कुशल १३ रनमा आउट भए।

क्यानडाका दिल्लोन हेलिगरले एक विकेट लिए। यसअघि टस हारेर पहिला ब्याटिङ गरेको क्यानडाले ५० ओभरमा ८ विकेट गुमाएर २३२ रन बनाएको थियो। क्यानडाका लागि नवनीत धलिवालले सर्वाधिक ५० रन बनाए भने निखिल दत्ताले ४५ रन बनाए।

त्यसैगरी हर्ष ठकेरले २९, श्रेयस मोभ्भाले २५, श्रीमान्थ विजेयेरात्नेले २२ तथा साद बिन जफारले अविजित ३१ रन बनाए। नेपाली बलर हेमन्त धामीले आफ्नो डेब्यू खेलमा ३ विकेट लिए।

त्यस्तै कुशल मल्लले २ तथा ललित राजवंशी र आकाश चन्दले एक एक विकेट लिए। नेपालले क्यानडालाई पहिलो खेलमा ७ रन तथा दोस्रो खेलमा ४ विकेटले हराएको थियो।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.