Nepal Times
Nepal Times
5.69k
Shares

दशरथ रंगशाला लथालिंग ,नेपालको खेल अर्काे देशमा

दशरथ रंगशाला लथालिंग ,नेपालको खेल अर्काे देशमा

फागुन १८ , काठमाण्डौ ।

अखिल नेपाल फुटबल संघ (एन्फा) ले चैत्रमा हुने पुरुष विश्वकप छनोट फुटबलको दोस्रो चरणको बहाराइनविरुद्धको खेलका लागि शुक्रबार आफ्नो प्रारम्भिक टोलीको घोषणा गरेको छ । एन्फाले घोषणा गरेको प्रारम्भिक टोलीमा गोलरक्षकका रुपमा अभिषेक बराल, विशाल सुनार, दीप कार्की र किरण चेम्जोङ रहेका छन् ।

डिफेन्डरका रुपमा अजय चौधरी, अनन्त तामाङ, अञ्जल महर्जन, विमल पाण्डे, विशाल बस्नेत, छिरिङ लामा, दीपेन्द्र बीके, रोहित चन्द, सनिष श्रेष्ठ, सुमित श्रेष्ठ र योगेश गुरुङ रहेका छन् । यसैगरी मिडफिल्डरमा एरिक बिष्ट, विकाल तामाङ, कृतिषरत्न छुन्जु, लाकेन लिम्बु, मनिकुमार लामा, मनिष डाँगी, रोहन कार्की, सन्तोष खत्री, सुरज ठकुरी र उत्सव राई रहेका छन् ।

स्ट्राइकरमा अञ्जन बिष्ट, आयुष घलान, दिनेश हेन्जन, गिलेस्पी जंग कार्की, हिसुब थपलिया, राजेश परियार, समिर तामाङ र सञ्जिव बिष्ट रहेका छन् । यसैबीच फिफा विश्वकप २०२६ अन्तर्गतको एसिया छनोटमा नेपालले बहराइनविरुद्धको आफ्नो होम म्याच समेत अर्को देशमा खेल्नु पर्ने भएको छ।

नेपालले बहराइनविरुद्ध चैत ८ मा घरेलु मैदानमा खेल्ने तय थियो। यो खेलपछि चैत १४ मा नेपालले बहराइनविरुद्ध उसैको मैदानमा खेल्नेछ। नेपालको एकमात्र अन्तर्राष्ट्रियस्तरको दशरथ रंगशालाको मैदानको अवस्था बिग्रिएपछि नेपालको खेल अर्कै देशमा हुने अखिल नेपाल फुटबल संघ (एन्फा) ले जनाएको छ।

दशरथ रंगशालामा यसअघि रग्बी प्रतियोगिता र विभिन्न स्कुलका कार्यक्रम भएका थिए। रंगशालाको व्यवस्थापन राष्ट्रिय खेलकुद परिषदले हेर्ने गरेको छ । एन्फाले एसियाली फुटबल महासंघका प्रतिनिधिले मैदानको निरिक्षण गरेको र त्यसमा सन्तुष्ट नभएको जनाएको छ। अब अर्को भेन्यू छिट्टै घोषणा गर्ने एन्फाले जनाएको छ।

मैदानको अभावले नेपालले यसअघि सन् २०१९ मा दशरथ रंगशालाको पुनर्निर्माण समयमै नसकिदा कुवेतविरुद्धको खेल भुटानमा खेल्नु परेको थियो। यसपटको छनोटमा समूह ’एच’ मा रहेको नेपालले यसअघि युएईसँग ४–० र यमनसँग २–० को हार बेहोरेको थियो। युएईसँग अवे र यमनसँग घरेलु मैदानमा खेल भएको थियो।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.