२७ फागुन, एजेन्सी ।
पाकिस्तानको राष्ट्रपतिमा सत्तारुढ गठबन्धनका उम्मेदवार आसिफ अली जरदारी विजयी भएका छन् । पाकिस्तानको निर्वाचन आयोगका अनुसार जरदारीले संसद् र चार प्रान्तीय सभालगायत सबै निर्वाचक मण्डलबाट ४ सय ११ मत ल्याएर विजयी भएको चिनियाँ समाचार संस्था सिन्ह्वाले जनाएको छ । जरदारीले सिनेट र नेसनल एसेम्बलीलगायत संसद्को दुई सदनको संयुक्त सत्रमा २ सय ५५ मत प्राप्त गरेका छन् ।
पूर्वी पञ्जाब प्रान्तबाट ४३ मत, उत्तरपश्चिम खैबर पख्तुनख्वा प्रान्तबाट ८ मत, दक्षिणपश्चिम बलुचिस्तान प्रान्तबाट ४७ मत र दक्षिणी सिन्ध प्रान्तबाट ५८ मत प्राप्त गरेका हुन् । जरदारीका प्रतिस्पर्धी विपक्षी दलको संयुक्त गठबन्धनका उम्मेदवार महमुद खान अचकजाईले कुल १ सय ८१ मत प्राप्त गरे । निवर्तमान राष्ट्रपति आरिफ अल्वी अस्ति शुक्रवार बिदा भएका थिए ।
जरदारी राष्ट्रपतिमा पदमा दोस्रो पटक निर्वाचित भएका हुन् । ६८ वर्षीय जरदारी सन् २००८ देखि २०१३ सम्म ११ औँ राष्ट्रपति भएका थिए । यस्तै गएको फेब्रुअरीमा भएको आम चुनावमा पनि उनी राष्ट्रिय सभा सदस्य निर्वाचित भएका थिए । राष्ट्रपतिमा विजयी भएसँगै उनले राष्ट्रिय सभाबाट राजीनामा दिनुपर्नेछ । आज दिउँसो ४ बजे उनले शपथ लिदैछन् ।
उनलाई यसैसाता प्रधानमन्त्री बनेका शहबाजÞ शरीफले दोस्रो पटक पाकिस्तानको राष्ट्रपति चुनिएकोमा बधाई दिएका छन् । शरीफले भनेका छन्, पाकिस्तानको राष्ट्रपतिका रुपमा उनी निर्वाचित हुनु लोकतान्त्रिक मूल्यहरुको निरन्तरता हो । जर्दारी पूर्वप्रधानमन्त्री बेनजिर भुट्टोका श्रीमान् हुन् ।
