Nepal Times
Nepal Times
666
Shares

प्रचण्डलाई विश्वासको मत दिन रास्वपाको ह्विप!

प्रचण्डलाई विश्वासको मत दिन रास्वपाको ह्विप!

२९ फागुन,काठमाण्डौ।

राष्ट्रिय स्वतन्त्र पार्टी (रास्वपा)ले प्रधानमन्त्री पुष्पकमल दाहाल प्रचण्डलाई विश्वासको मत दिन आफ्ना सांसदहरूलाई ह्विप जारी गरेको छ । आज बिहान बसेको संसदीय दलको बैठकले सरकारलाई विश्वासको मत दिने निर्णय गर्दै सबै सांसदलाई अनिवार्य उपस्थिति भएर मत दिन ह्विप जारी गरेको हो ।

प्रधानमन्त्री दाहालले भोलि बुधबार प्रतिनिधि सभामा विश्वासको मत लिने तयारी गरेका छन् । चार मन्त्रालयका साथ सरकारमा सहभागी भएको रास्वपाका २१ सांसद रहेका छन् । अघिल्लो सोमबार रास्वपा नयाँ गठबन्धन बनेसँगै सरकारमा सामेल भएको थियो ।

प्रचण्डले रास्वपासंगै एमाले, जसपाबाट विश्वासको मत पाउँने निश्चित छ । नेकपा एकीकृत समाजवादीले भने आफ्ना मागहरुको प्रधानमन्त्रीले लिखित ग्यारेन्टीसहित सम्बोधन गरेमात्रै विश्वासको मत दिने बताएको छ ।

यता राष्ट्रियसभामा अध्यक्षमा नारायणका दाहाललाई जिताउन र प्रधानमन्त्रीलाई विश्वासको मत दिलाउन सत्ता गठबन्धनको संयुक्त बैठक बसेको छ। गठबन्धनमा एमाले, माओवादी, रास्वपा, नेकपा एस र जसपा सहभागी छन्।

गठबन्धनमा असन्तुष्टि जनाउँदै आएका माधव नेपालको माग पूरा गर्न प्रधानमन्त्री पुष्पकमल दाहाल प्रचण्ड र एमाले अध्यक्ष केपी शर्मा ओलीबीच छलफलपछि उनको माग आंशिक पूरा भएको छ।

पाँच दलबीच लिखित सहमति भएपछि नेपाल पनि मत दिन तयार भएका छन् । राष्ट्रियसभा अध्यक्षको निर्वाचनमा गठबन्धनका उम्मेदवार दाहाललाई मत दिन ओलीले ह्विप जारी गरेका छन्।

बैठकपछि नेकपा माओवादी केन्द्रका वरिष्ठ उपाध्यक्ष समेत रहेका उपप्रधानमन्त्री नारायणकाजी श्रेष्ठले ५ दलबीच लिखित सहमति भइसकेको बताएका छन् ।

यसैबीच नेकपा एमालेका पोलिटब्युरो सदस्य गोकुल बास्कोटाले नेकपा एकीकृत समाजवादीका अध्यक्ष माधवकुमार नेपालले आफू प्रधानमन्त्री बन्ने पक्का गर्न प्रधानमन्त्री पुष्पकमल दाहाल प्रचण्डलाई लिखित सहमति गराउने दाबी गरेका छन् ।

राष्ट्रिय सभा अध्यक्षको निर्वाचन हुने दिन बिहानै सामाजिक सञ्जालमार्फत प्रतिनिधि सभा सदस्यसमेत रहेका एमाले नेता बाँस्कोटाले एकीकृत समाजवादीका प्रमुख सचेतक मेटमणि चौधरीले प्रधानमन्त्री प्रचण्डबाट आफ्ना अध्यक्षलाई एक वर्षका लागि प्रधानमन्त्री बन्ने ग्यारेन्टीको लिखित सहमति गराएरै छाड्ने दाबी गरेका हुन् ।

बाँस्कोटाले सामाजिक सञ्जालमा लेखेका छन्, ‘एक वर्ष प्रम ग्यारेन्टी हुने प्रचण्डपत्र मेटमणिले माधव नेपाललाई दिलाएरै छाड्ने पक्का देखियो । राजनीति हो, असम्भव भन्ने शब्दावली डिलिट हान्दिएँ ल जे पर्छ परोस्।’

राष्ट्रियसभामा उपाध्यक्षसहित माओवादीको १८, एमालेका १०, एकीकृत समाजवादीका ८, जसपाका ३ गरी ३९ सांसद छन्। भने कांग्रेसका शर्मालाई कांग्रेसको १६ र लोसपाका एक सांसदको समर्थन छ। प्रधानमन्त्री प्रचण्डले भने भोलि विश्वासको मत लिने कार्यक्रम रहेको छ ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.