११ चैत , एजेन्सी ।
इण्डियन प्रिमियर लिग (आईपीएल) क्रिकेटमा आज पनि दुई वटा खेल हुँदैछन् । नेपाली समय अनुसार दिउँसो पौने ४ बजे राजस्थान रोयल्स र लखनउ सुपर जाइन्टस् तथा राति पौने ८ बजे गुजरात टाइटन्स र मुम्बई इण्डियन्स खेल्दैछन् । राजस्थानको कप्तानी सन्जु सामसन र लखनउको केएल राहुलले गर्नेछन् ।
राजस्थान आईपीएल पहिलो सिजन (२००८) को विजेता टोली हो । त्यस्तै गुजरातको शुभमन गिल र मुम्बईको कप्तान हार्दिक पाण्डेय रहेका छन् । मुम्बई ५ पटकको च्याम्पियन टोली हो । गुजरात पछिल्ला दुई सिजन फाइनलमा पुगेको थियो । सन् २०२२ मा पहिलो पटक सहभागी गुजरातले राजस्थानलाई हराएर उपाधि जितेको थियो ।
हिजो भएका खेलमा कोलकाता नाइट राइर्डस र पञ्जाव किङ्गसले विजयी शुरुवात गरेका छन् । कोलकाताले सनराइर्जस हैदराबादलाई चार रनले तथा पन्जावले दिल्ली क्यापिटल्सलाई ४ विकेटले हरायो । कोलकाताले दिएको २०९ रनको लक्ष्य पछ्याएको हैदरावादले निर्धारित २० ओभरमा ७ विकेट गुमाउँदै २०४ रन मात्रै बनाउन सक्यो ।
जितका लागि हैदरावादलाई अन्तिम ६ बलमा १३ रन चाहिएको थियो । हर्षित रानाको पहिलो बलमा क्लासनले डीप स्क्वायर लेगमा छक्का प्रहार गरे । दोस्रो बलमा हर्षितले क्लासनलाई १ रनमात्रै दिए । तेस्रो बलमा भने हर्षितले अहमदलाई कप्तान श्रेयस आय्यरबाट क्याच आउट गराए । अन्तिम बलमा हैदरावादलाई ४ रन चाहिएको थियो ।
तर, हर्षितले कप्तान प्याट कमिन्सलाई कुनै रन दिएनन् । हैदरावादका अभिषेक शर्मा र ओपनर मयंक अग्रवालले ३२–३२ रन बनाए। राहुल त्रिपाठी २०, एडम मारक्रम १८, शाहबाज अहमद १६ रनमा आउट हुँदा अब्दुल समदले १५ रनको योगदान दिए । हर्षित रानाले सर्वाधिक ३ विकेट लिए। अलराउन्ड प्रर्दशन गरेका आन्द्रे रसेलले २ विकेट लिए ।
त्यसअघि घरेलु मैदान ईडन गार्डनमा टस हारेर पहिला ब्याटिङ थालेको कोलकाताले निर्धारित २० ओभरमा ७ विकेट गुमाउँदै २०८ रन बनाएको थियो । कोलकाताका आन्द्रे रसेलले अविजित रहँदै सर्वाधिक ६४ रन बनाए । उनले २५ बलमा ३ चौका र ७ छक्का प्रहार गरे । ओपनर फिल साल्टले ५४ रन बनाउँदा रमनदीप सिंह ३५ र रिन्कु सिंह २३ रनमा आउट भए ।
हैदरावादका थंथारसु नटराजनले सर्वाधिक ३ विकेट लिए । मयंक मार्कन्डेले २ विकेट लिँदा प्याट कमिन्सको नाममा १ विकेट रह्यो । त्यसअघि भएकोे खेलमा पञ्जाव किंग्स ४ विकेटले विजयी भएको छ । टस हारेर पहिले ब्याटिङ गरेको दिल्लीले दिएको १७५ रनको लक्ष्य पञ्जावले १९.२ ओभरमा ६ विकेट गुमाउँदै भेटायो ।
लक्ष्य भेटाउने क्रममा पञ्जाबका साम करनले ६३, लियाम स्टेफेन लिभिङस्टोनले ३८, प्रभसिमरन सिंहले २६ र कप्तान शिखर धवनले २२ रनको योगदान गरे । दिल्लीका कुलदीप यादव र खलील अहमदले २÷२ तथा इशान्त शर्माले एक विकेट लिए । यसअघि पहिले ब्याटिङ गरेको दिल्लीले सबै २० ओभर खेल्दै ९ विकेटको क्षतिमा १७४ रन बनाएको थियो ।
उसका लागि डेभिड वार्नरले २९, मिचेल मर्शले २०, शाइ होपले ३३, रिषभ पन्तले १८, अक्षर पटेलले २१ र अबिशेक पोरेलले ३२ रन बनाएका थिए । पञ्जाब किंसका हर्षल पटेल र अर्शदीप सिंहले दुई÷दुई, राहुल चाहर, हरप्रीत ब्रार र कागिसो रबाडा एक÷एक विकेट लिए । उद्घाटन खेलमा चेन्नईले बेंगलुरुलाई ६ विकेटले हराउँदै विजयी शुरुवात गरेको छ ।
