२ वैशाख , एजेन्सी ।
इंग्लिस प्रिमियर लिगमा म्यानचेस्टर सिटीले शनिबारको खेलमा लुटन टाउनलाई ५–१ ले हराउँदै जित दर्ता गरेको छ । सिटीका माटेओ कोभाए, एर्लिङ हालान्ड, जेर्मी डोकु र जाको गाभ्राडिओलले समान १ गोल गरे । लुटनका लागि रोस ब्राकलेले गोल फर्काए । सिटीले सुरुआती अग्रता आत्मघाती गोलबाट लिएको थियो । दोस्रो मिनेटमा लुटनका डेकी हिसाहोकाले आफ्नै पोस्टमा गोल गरेपछि सिटीले अग्रता लिएको थियो ।
कोभाएले ६५ औं मिनेटमा जुलियन अल्भारेजको पासमा गोल गर्दै अग्रता दोब्बर बनाए । हालान्डले ७६ औं मिनेटमा पेनाल्टीमा गोल गरेपछि सिटीले अग्रता ३–० बनायो । ८१ औं मिनेटमा ब्राकलेले गोल गरेपछि लुटनले अन्तर घटाएको थियो । ८७ औं मिनेटमा जेर्मी र इन्ज्युरी समयमा ग्राभाडिओलले गोल गर्दै टोलीको जितलाई फराकिलो बनाएका थिए ।
यस्तै कप्तान तथा मिडफिल्डर ब्रुनो फर्नान्डेसले दुई गोल गरेपछि म्यानचेस्टर युनाइटेड हारबाट जोगिएको छ । खेलमा दुईपटक पछि परेको स्थितिमा ब्रुनोले दुई गोल गरेपछि युनाइटेडले घरेलु टोली बर्नमाउथसँग २–२ गोलको बराबरी खेलेको हो । बर्नमाउथका डोमिनिक सोलांके र जस्टिन क्लुइभर्टले गोल गरेपनि जित निकाल्न सकेन ।
१६औं मिनेटमा सोलांकेले गोल गर्दै बर्नमाउथलाई १–० को अग्रता दिलाए । ३१औं मिनेटमा ब्रुनोले गोल गर्दै खेललाई १–१ गोलको बराबरीमा ल्याए । ३६औं मिनेटमा जस्टिनले गोल गरेपछि बर्नमाउथले पहिलो हाफमा १–० को अग्रता लिन सफल भयो । पहिलो हाफमा पछि परेको युनाइटेडका लागि ६५औं मिनेटमा ब्रुनोले पेनाल्टीमा गोल गर्दै खेललाई २–२ गोलको बराबरीमा ल्याए ।
इन्ज्युरी समयमा बर्नमाउथले पेनाल्टीको अपिल गरेपनि भिएआरबाट मान्यता पाएन । त्यसपछि थप गोल निस्कन नसक्दा खेल बराबरीमा टुंगियो । यस बराबरीसँगै युनाइटेड ३२ खेलबाट ५० अंक जोडेर सातौं स्थानमा छ । बर्नमाउथ ४२ अंक जोडेर १२औं स्थानमा छ । शनिबार अन्य खेलमा नटिङघम फरेस्ट र वुल्भ्सले २–२ तथा बर्नली र ब्राइटनले १–१ को बराबरी खेलेका छन् ।
ब्रेन्टफोर्डले सेफिल्ड युनाइटेडलाई २–० र न्युक्यासल युनाइटेडले टोटनहमलाई ४–० ले हराएको थियो । जितसँगै सिटी शीर्ष स्थानमा उक्लिएको छ । सिटीले ३२ खेलबाट ७३ अंक पुगेको छ । एक खेल कम खेलेको दोस्र्रो स्थानको आर्सनल र तेस्रो लिभरपुलको समान ७१ अंक छ । लुटन २५ अंकसहित १८ औं स्थानमा छ ।
उता, स्पेनिस ला लिगाको शीर्षस्थानमा रहेको रियल म्याड्रिड र बार्सिलोनाले सफलता हात पारेका छन् । रियलले घरेलु टोली मलोर्कालाई १–० ले पराजित गर्दै उपाधि यात्रालाई थप मजवुत बनाएको छ । रियलको जितमा दोस्रो हाफमा ओरेलिएन चुआमेनीले गरेको गोल नै निर्णायक बन्यो । यस जितसँगै शीर्षस्थानमा रहेको रियलको ३१ खेलबाट ७८ अंक पुगेको छ ।
रियलले दोस्रो स्थानमा रहेको बार्सिलोनालाई ८ अंकले पछि पारेको छ । ला लिगाकै अर्काे खेलमा बार्सिलोनाले क्याडिजलाई १–० ले पराजित गरेको छ । बार्सिलोनाको जितमा ३७औं मिनेटमा जोआओ फेलिक्सले गरेको गोल नै निर्णायक बन्यो । यस जितले बार्सिलोनाले शीर्षस्थानको रियलसँगको अंक दुरी ८ मै राखेको छ । बार्सिलोनाको ३१ खेलबाट ७० अंक छ । पराजित क्याडिज ३१ खेलबाट २५ अंक जोडेर रेलिगेसन जोनको १८औं स्थानमा छ ।
