१० वैशाख, एजेन्सी ।
इन्डियन प्रिमियर लिग (आईपीएल) क्रिकेटको १७औँ संस्करणमा सोमबार मुम्बई इन्डियन्सले बलियो प्रतिद्वन्द्वी राजस्थान रोयल्सको सामना गर्नेछ । खेल जयपुरस्थित सवाई मानसिंह स्टेडियममा राति ७ः४५ बजे सुरु हुनेछ ।आईपीएलको जारी संस्करणमा राजस्थान रोयल्स सबैभन्दा बलियो टोलीको रुपमा देखिएको छ भने मुम्बई इन्डियन्सको प्रदर्शन सामान्य रहेको छ ।
राजस्थानले आफ्नो आठौँ खेल खेल्न लागेको हो । यसअघि खेलिएको सातमध्ये ६ खेलमा राजस्थान विजयी भएको छ । एक खेलमा भने राजस्थानले पराजय ब्यहोरेको छ । राजस्थान रोयल्स १२ अंकसहित तालिकाको पहिलो स्थानमा आसिन छ । यो सिजनको आईपीएलमा राजस्थान रोयल्सले हालसम्म एकमात्र हार गुजरात टाइटन्ससँग ब्यहोरेको हो ।
गुजरातले राजस्थानलाई तीन विकेटले हराएको थियो । मुम्बई इन्डियन्सले पनि जारी आईपीएलमा आफ्नो आठौँ खेल खेल्न लागेको हो । मुम्बई यसअघि खेलिएको सातमध्ये तीन खेलमा विजयी र चार खेलमा पराजित भएको छ । मुम्बई इन्डियन्स ६ अंकसहित तालिकाको सातौँ स्थानमा आसिन छ ।
सोमबारको खेलमा राजस्थानलाई हराउन सके मुम्बई इन्डियन्स तालिकाको पाँचौँ स्थानमा उक्लने सम्भावना छ । राजस्थानलाई ठूलो अन्तरले हराउन सके मुम्बई तालिकाको चौथो स्थानमा उक्लने सम्भावना पनि उत्तिकै छ । इन्डियन प्रिमियर लिग (आईपीएल) को १७औँ संस्करणमा राजस्थान रोयल्स र मुम्बई इन्डियन्सबिच दोस्रो पटक भिडन्त हुन लागेको हो ।
यसअघि यी दुई टोलीबिच खेलिएको खेलमा राजस्थानले मुम्बईलाई हराएको थियो । त्यो खेल मुम्बईको घरेलु मैदानमा खेलिएको थियो । इन्डियन प्रिमियर लिगमा हालसम्म मुम्बई इन्डियन्स र राजस्थान रोयल्सबिच कुल २९ खेल खेलिएको छ । त्यसमध्ये १५ खेलमा मुम्बईले राजस्थानलाई पराजित गरेको छ । १३ खेलमा भने राजस्थानले मुम्बईलाई हराएको छ ।
यी दुई टोलीबिचको एक खेल भने अनिर्णित रुपमा सकिएको थियो । यसैबीच गुजरात टाइटन्सले इन्डियन प्रिमियर लिग (आईपीएल)मा पञ्जाब किंग्सलाई पराजित गरेको छ। आइतबार राति सम्पन्न खेलमा पञ्जाबलाई गुजरातले ३ विकेटले पराजित गरेको हो। पञ्जाबले दिएको १४३ रनको लक्ष्य पछ्याएको गुजरातले १९.१ ओभरमा ७ विकेट गुमाउँदै १४६ र बनायो।
जितसँगै सातौँ स्थानमा रहेको गुजरातले ८ खेलबाट ८ अंक जोडेको छ। समान खेल खेल्दै नवौँ स्थानमा रहेको पञ्जाबको ४ अंक रहेको छ। यस्तै आइतबारकै पहिलो खेलमा कोलकाता नाइट राइडर्सले रोयल च्यालेन्जर्स बैंगलुरुमाथि एक रनको रोमाञ्चक जित हासिल गरेको छ । टस हारी पहिले ब्याटिङको निम्तो पाएको कोलकाताले निर्धारित ओभरमा ६ विकेट गुमाएर दुई सय २२ रन बनाएको थियो ।
जवाफी ब्याटिङमा ओर्लिएको बैंगलुरुले भने निर्धारित ओभरमा आफ्नो सबै विकेट गुमाएर दुई सय २१ रनमात्र बनाउन सक्यो । महत्त्वपूर्ण जितसँगै कोलकाता १० अंक बटुल्दै तालिकाको दोस्रो स्थानमा उक्लिएको छ । बैंगलुरुले भने आफ्नो निराशाजनक प्रदर्शन जारी राखेको छ । हालसम्म आठ खेल खेलेको बैंगलुरुले सात खेलमा हार भोगिसकेको छ । एक खेलमा मात्र बैंगलुरु विजयी भएको छ । बैंगलुरु दुई अंकसहित तालिकाको सबैभन्दा तल अर्थात १०औँ स्थानमा छ ।
