२१ वैशाख, काठमाण्डौ ।
सहकारी ठगी प्रकरणमा मुछिएकी आफ्ना सांसदलाई अनुशन्धानमा अघि सारेर राष्ट्रिय प्रजातन्त्र पार्टी (राप्रपा)ले उपप्रधान तथा गृहमन्त्रालयसहित सरकारमा गएको राष्ट्रिय स्वतन्त्र पार्टी(रास्वपा)लाई कडा चुनौती दिएको छ । रास्वपाका सभापति एवं गृहमन्त्री रवि लामिछानेसहितका नेताहरु विभिन्न सहकारी ठगी प्रकरणमा मुछिएको आरोप लागिरहेको छ ।
यस्तोमा राप्रपाले सहकारीबाट करोडौं रुपैयाँ अपचलनमा मुछिएकी पार्टीकी समानुपातिक सांसद गीता बस्नेतलाई छानबिनमा सहयोग गर्न निर्देशन दिएको छ । बिहीबार बसेको पार्टी केन्द्रीय कार्य सम्पादन समितिको बैठकले सहकारीको बचत अपचलनमा मुछिएकी सांसद बस्नेतलाई राज्यका निकायले गर्ने निष्पक्ष छानबिनमा सहयोग गर्न निर्देशन दिएको हो ।
नवलपरासी पूर्वमा रहेको छिपछिपे उपभोक्ता सहकारी संस्थाको १६ करोड ५८ लाख ९२ हजार रुपैयाँभन्दा बढी रकम ठगी प्रकरणमा उनी मुछिएकी छिन् । सहकरीको बचत अपचलनमा मुछिएपछि वैशाख १४ गते सांसद बस्नेतसहित ८ जनाविरुद्ध जिल्ला अदालत नवलपुरले पक्राउ पुर्जी जारी गरेको छ ।
‘राप्रपाकी प्रतिनिधिसभा सदस्य गीता बस्नेतको कम्पनीबाट सहकारीको रकम अपचलन भएको भन्ने विषय सञ्चारमाध्यमबाट सार्वजनिक भएकोमा सो सम्बन्धि छानबिनमा सघाउ पुर्याउन गीता बस्नेतलाई निर्देशन दिइएको छ । साथै, उक्त घटनाका विषयमा नेपाल सरकारको जिम्मेवार निकायबाट निश्पक्ष छानबिन गर्न र सहकारीको रकम अपचलन सम्बन्धि त्यस्तै प्रकारका घटनामा संलग्न अन्य व्यक्तिहरुमाथि पनि स्वतन्त्र छानबिन गर्न राप्रपा सरकारसँग माग गर्दछ’ पार्टी प्रवक्ता एवं प्रचार विभाग प्रमुख मोहन कुमार श्रेष्ठद्वारा जारी विज्ञप्तिमा उल्लेख छ ।
श्रेष्ठका अनुसार बस्नेत अहिले पार्टी नेताहरुको सम्पर्कमा समेत छैनन् । बैठकले बस्नेतलाई अनुसन्धानका लागि राज्यलाई सघाउन र बस्नेतका साथै सहकारी ठगी प्रकरणमा जोडिएका मन्त्री, नेता सबैको निष्पक्ष छानबिन गर्न राप्रपाले माग गरेको श्रेष्ठले बताए । समाचार आएपछि आफ्नो पार्टीकी सांसदलाई छानबिनमा सघाउन र अनुसन्धान गर्न सरकारलाई माग गरिरहँदा सरकारमा रहेका मन्त्रीलाई भने गिज्याएको छ ।
उपप्रधान तथा गृहमन्त्री रवि लामिछाने, श्रम मन्त्री डिपी अर्याल सहकारी ठगीमा मुछिएका छन् । प्रमुख प्रतिपक्षी नेपाली कांग्रेस, प्रतिपक्षी राप्रपा लगायतले उनीहरुमाथि छानबिनको माग गरिरहे पनि सत्तापक्ष बचाउमा उत्रिएको छ भने आरोपी मन्त्रीहरुले राजीनामा दिन नपर्ने बताइरहेका छन् ।
सांसद बस्नेत जोडिएको सहकारी ठगीमा नवलपुरको कावासोतीमा रहेको छिपछिपे उपभोक्ता सहकारी संस्था, चितवनको सनराइज सहकारी र बर्दियाको नमस्ते सहकारीमा पनि एउटै समूहको संलग्तना रहेको पाइएको छ । कावासोतीको छिपछिपे उपभोक्ता सहकारीबाट १६ करोड ५८ लाख ९२ हजार रुपैयाँभन्दा बढी, चितवनको सनराइज सहकारीबाट बचतकर्ताको २० करोड रुपैयाँ भन्दा बढी र बर्दियाको नमस्ते सहकारीबाट ७ करोड रुपैयाँभन्दा बढी रकम अपचलन गरेको पाइएको छ ।
बचतकर्ताले दिएको उजुरी र अहिलेसम्मका प्रारम्भिक अनुसन्धानले बस्नेतको समेत संलग्नता देखाएको छ । उनको समेत संलग्ना देखिएको र उनीसहित ८ जनाविरुद्ध पक्राउ पुर्जी जारी भएको बताइएको छ । राप्रपाले बर्दियाबाट गीता बस्नेतलाई प्रतिनिधिसभामा समानुपातिक सांसद बनाएको थियो । उनलाई तत्कालीन राजा ज्ञानेन्द्र शाहले बर्दियाको गुलरिया नगरपालिकाको मेयरमा मनोनित गरेका थिए । अहिले उनी प्रहरीको फरारको सूचीमा रहेको बताइएको छ ।
