संसदको आजको रमिता, प्रचण्डको डरले दिलायो विश्वास

७ वैशाख , विराटनगर।

प्रधानमन्त्री पुष्पकमल दाहाल प्रचण्डले चौथोपटक विश्वासको मत पाएका छन् । विश्वासको मतको पक्षमा १५७ सांसद उभिएका थिए विपक्षमा भने एकजना मात्रै रहेका छन् । तेस्रो पटक विश्वासको मत लिँदा पक्षमा १५७ मत नै परेको थियो । अर्थात् उनले तेस्रो र चौथोपटक विश्वास संख्याका हिसाबले कायम राखेका छन् । जनता समाजवादी पार्टी, नेपालले समर्थन फिर्ता लिएपछि उनले विश्वासको मत लिएका हुन् । तर उनलाई यो विश्वासको मत लिन भने ठूलो हैरानी खेप्नु परेको छ ।

यससँगै प्रधानमन्त्रीलाई विश्वासको मत दिलाउने भूमिकामा रहेका सभामुखले यसैकारण दलको कार्यकर्ता भएको आरोप सहनु परेको छ । सोमबारको प्रतिनिधिसभा बैठकमा प्रतिपक्षी दल नेपाली कांग्रेसलाई मार्शलले घेरेर प्रधानमन्त्रीले विश्वासको मत लिएका हुन् । मर्यादापालकको बाक्लो उपस्थितिमा विश्वासको मत माग्दै सभा सञ्चालन गरिएको थियो । सुरुमा पहिलो बैठक कांग्रेसकै अवरोधपछि १५ मिनेटका लागि स्थगित भएपछिको बैठकमा प्रधानमन्त्रीले विश्वासको मत लिए ।

प्रमुख प्रतिपक्षी नेपाली कांग्रेसको अवरोधका बीच मर्यादापालक लगाएर प्रधानमन्त्री पुष्पकमल दाहाल प्रचण्डलाई रोष्ट्रम पु¥याइएको थियो । प्रतिनिधिसभाको दोस्रो बैठक सुरु हुनासाथ सभामुखले मर्यादापालकलाई अनुरोध गर्दै प्रधानमन्त्रीलाई रोष्ट्रममा पु¥याए । नाराबाजीका बीच प्रधानमन्त्रीले विश्वासको मत मागे । नाराबाजीकै बीच मतदान भयो भने विश्वासको मत रहेको घोषणा पनि भयो । एकातिर नाराबाजी र अर्कोतिर विश्वासको मत लिने प्रक्रिया चलिरहँदा प्रतिनिधि सभामा रमिता देखिएको थियो ।

उनले तेस्रोपटक मत लिँदा १५७ मत पाएका थिए । त्यतिबेला एमालेको ७७, माओवादीको ३२, रास्वपाको २१, जसपाको १२, एकीकृत समाजवादीको १०, नाउपाको ४ र आम जनता पार्टीका एक सांसदले विश्वासको मत दिएका थिए । जसपा नेपाल विभाजनपछि सरकारलाई अशोक राई नेतृत्वको जसापाका ७ जनाले समर्थन कायमै राखेका छन् । जसपा नेपालका ५ जना सांसदले समर्थन फिर्ता लिएकाले सरकारसँग १५२ जनाको समर्थन कायमै देखिन्छ ।

यद्यपि जसपा विभाजनको टुङ्गो नलागेको अवस्थामा प्रधानमन्त्रीले लिने विश्वासको मतले वैधता नपाउने ठहर गर्दै त्यसलाई रोक्न अध्यक्ष उपेन्द्र यादवले आइतबार सर्वोच्च अदालतमा रिट निवेदन दिएका छन् । दुई सय ७५ सदस्यीय प्रतिनिधिसभामा बहुमतका लागि कम्तीमा १३८ मत आवश्यक पर्छ । हाल प्रतिनिधि सभामा कांग्रेसका ८८, एमालेका ७९, माओवादी केन्द्रका ३२, रास्वपाका २१, राप्रपाका १४, एकीकृत समाजवादीका १०, जसपाका ७, जनमत पार्टीका ६, जसपा नेपालका ५, लोसपा र नाउपाका समान चार÷चार सांसद छन् ।

यस्तै नेपाल मजदुर किसान पार्टी, राष्ट्रिय जनमोर्चा, आम जनता पार्टीको समान एक÷एक र स्वतन्त्रका दुई सांसद छन् । तीमध्ये एमालेका देवराज घिमिरे सभामुख भएका र अर्का सांसद टोपबहादुर रायमाझी नक्कली भुटानी शरणार्थी प्रकरणमा थुनामा रहेकाले निलम्बनमा परेका छन् ।फागुन २७ गते सरकारमा सामेल भएको जसपा नेपाल वैशाख ३१ गते सरकारबाट बाहिरिएको थियो ।

७ सांंसदले पार्टी विभाजन गरेर जनता समाजवादी पार्टी गठन गरेपछि उपेन्द्र यादवले सरकारको समर्थन फिर्ता लिएका थिए । यादवले निर्वाचन आयोगले असंवैधानिक ढंगबाट पार्टी विभाजनको निवेदनलाई मान्यता दिएको भन्दै यादवले सर्वोच्चमा रिट दायर गरे । सर्वोच्चले निर्वाचन आयोगको निर्णय यथास्थितिमा राख्न अल्पकालनी अन्तरिम आदेश जारी गरेको थियो । उनको रिटमा मंगलबारबाट सुनुवाइ हुने तय भएको थियो ।

त्यसबाहेक जसपा नेपाल विभाजन भएर गएका सांसदहरु विश्वासको मतमा उपस्थित हुन नमिल्ने भन्दै सर्वोच्चमा रिट दायर भएपछि प्रधानमन्त्रीले विश्वासको मत लिएका छन् । जसपाले सभामुखलाई ७ सांसदलाई मतदानमा सहभागि नगराउन भन्दै लेखेको पत्र र सर्वाेच्चको जसपा नेपालको पक्षमा आउन सक्ने फैसलाको डरले प्रचण्डले आज विश्वासको मत लिएका छन् । २७५ सदस्यीय संसद्को विश्वास रहन १३८ सांसदको आवश्यकता पर्छ ।

उनले १५७ मत प्राप्त गरे । उनलाई सत्तासाझेदार ठूलो दल नेकपा (एमाले),माओवादी राष्ट्रिय स्वतन्त्र पार्टी (रास्वपा), नेकपा (एकीकृत समाजवादी), जनता समाजवादी पार्टी, जनमत, नागरिक उन्मुक्ति र स्वतन्त्र सांसदले मत दिए ।तत्कालीन नेपाली कांग्रेससहितका दलको चुनावी गठबन्धन छोडी प्रधानमन्त्री पुष्पकमल दाहाल प्रचण्ड ०७९ पुष १० गते एमालेसहित ७ दलको समर्थनमा प्रधानमन्त्री नियुक्त भएका थिए ।

कांग्रेसले प्रधानमन्त्री दिन अस्वीकार गरेपछि उनी एमालेसहितका ७ दलको साथमा प्रधानमन्त्री बनेका थिए । उनले सदनमा पहिलोपटक पुस २५ गते विश्वासको मत लिए । त्यतिबेला प्रचण्डले २६८ सांंसदको विश्वास पाएका थिए । एमालेसँगको गठबन्धन झण्डै दुई महिनामात्रै टिक्यो । राष्ट्रपतिको विषयमा कुरा नमिल्दा प्रचण्डले एमालेसँगको गठबन्धन तोडे र फेरी कांग्रेससँगै जोडिन पुगे । एमालेसहितका दलले समर्थन फिर्ता लिएपछि दोस्रो पटक फागुन ०६ गते विश्वासको मत लिएका थिए ।

त्यतिबेला उनको पक्षमा १७२ मत परेको थियो । विपक्षमा ८९ सांसद रहे । एक सांसद तटस्थ बसेका थिए । तेस्रोपटक विश्वासको मत लिँदा ग्राफ झनै ओरालो लाग्यो । उनकै भाषामा उथलपुथल भइरहँदा १५ महिनाको अवधिमा तेस्रोपटक विश्वासको मत लिनु परेको थियो । राष्ट्रपतिको विषयले बनेको गठबन्धन राष्ट्रियसभा अध्यक्षको चुनावअघि भत्कियो । कांग्रेससँगको गठबन्धन फेरेर एमालेसँग गठबन्धन बनाए ।

उनले ०८० फागुन ३० गते विश्वासको मत लिए । उनको प्रचण्डको पक्षमा १५७ सांसद उभिएका थिए । विपक्षमा ११० मत परेको थियो । १ सांसद तटस्थ रहेका थिए । प्रधानमन्त्री बनेको १७औं महिनामा प्रधानमन्त्रीले चौथो पटक विश्वासको मत लिएका हुन् । उनी प्रधानमन्त्री बनेको जेठ १० गते १७ महिना पूरा हुँदैछ । तेस्रो पटकको विश्वासको मत लिँदा प्रधानमन्त्रीको विपक्षमा उभिएको जनमत पार्टी भने यसपटक पक्षमा उभियो । जसपा नेपालले सरकारलाई दिएको समर्थन फिर्ता लिएको आठ दिन नहुँदै प्रधानमन्त्रीले विश्वासको मत लिएका छन् ।

नेपाली कांग्रेसका प्रमुख सचेतक रमेश लेखकले सरकार लोकतन्त्र, संसदीय मूल्य र मान्यताप्रति गैरजिम्मेवार, असहिष्णु र अनुदार भएको आरोप लगाएका छन् । उनले सत्तापक्षमा निरंकुशताको मनोवृत्ति हाबी भएको बताए । बहुमतको दम्भमा सरकारले आजै विश्वासको मत लिनकुरा नेपालको संसदीय इतिहासमा नौलो र दुःखदायी घटना भएको बताए । यस्तै उनले सभामुख देवराज घिमिरेले पार्टी विशेषको कार्यकर्ताको रुपमा प्रश्तुत हुनेगरी कारबाही अघि बढाएको बताएका छन् ।

उनले कांग्रेसमाथि धम्की दिएर तर्साउने नखोज्न चेतावनी पनि दिएका छन् । उनले कांग्रेसलाई माओवादीले भोटको राजनीति शुरु गरेपछि मात्रै सहयोग गरेको भएपनि कांग्रेसले जंगलमा हुँदादेखि माओवादीलाई सहयोग गरेको बताए । माओवादीलाई जंगलबाट संसदमा ल्याउने काम कांग्रेसले गरेको भन्दै गैरजिम्मेवारपूर्ण अभिव्यक्ति दिएर कांग्रेसलाई तर्साउन नखोज्न चेतावनी दिएका छन् ।

प्रधानमन्त्री पुष्पकमल दाहाल प्रचण्डले आवश्यक परेमा १०–१२ पल्ट विश्वासको मत लिने बताएका छन् । उनले विश्वासको मत लिएपछि पत्रकारसँग संक्षिप्त कुरा गर्दै यस्तो बताएका हुन् । “जरुरी परे १०–१२ पटक विश्वासको मत लिन्छु,” उनले भने, “नेपालमामात्रै होइन विश्वको मत लिन्छु । कांग्रेसले अर्को चुनावमा देख्छ ।”
प्रचण्डले १७ महिनाको छोटो अवधिमा चौथो पटक विश्वासको मत लिएका छन् । नेपालको संसदीय इतिहासमै यति छोटो अवधिमा एकै कार्यकालमा विश्वासको मत लिने प्रचण्ड नै पहिलो प्रधानमन्त्री हुन् । यस्तै विश्वासको मत लिँदा सदनमा देखिएको आजको जस्तो रमिता पनि पहिलो पटक नै हो । यसैले त रुष्ट बनेका प्रधानमन्त्रीले कांग्रेसलाई अबको चुनावमा देखाइदिने बताएका छन् भने कांग्रेसले जंगलबाट राजनीतिमा ल्याएको प्रचण्डलाई स्मरण गराएको छ ।

स्मरणीय कुरा के छ भने गएको चुनावमा माओवादी र कांग्रेस एकअर्काका कार्यकर्ताको मतबाट विजयी भएका हुन् । अहिले दुवै अलग अलग बाटोमा लागिसकेका छन् ।आज नाराबाजीका बीच मर्यादमापालक लगाएर विश्वासको मत लिनुलाई सत्तापक्षीय सांसदहरुले स्वभाविक भनेका छन् भने विपक्षी सांसदहरुले असभ्य, अलोकतान्त्रिक दम्भ लगायतका उपमा दिएका छन् । तपाईले भने आज संसदमा देखिएको गतिविधिलाई कसरी हेर्नुभएको छ ? आप्ना विचार अवश्य ब्यक्त गर्नुहोला ।ताजा खबरका लागि नेपाल टाइम्स्को अनलाइन पोर्टल डब्लु डब्लु डब्लु डट नेपाल टाइम्स् डट नेटमा गएर हेर्न सक्नु हुनेछ । यसैगरि हाम्रो युट्युव च्यानल र फेसबुक पेज पनि अवस्य भिजिट गर्नुहोला । तपाईले गर्नु भएको लाइक, कमेन्ट, सेयर र सब्क्राइबका लागि धेरै धन्यवाद । नेपाल टाइम्स् हेर्दै गर्नुहोला नमस्कार ।