Nepal Times
Nepal Times
3
Shares

वेस्ट इन्डिज भर्सेस पपुवा न्यु गिनी, को छ बलियो ?

वेस्ट इन्डिज भर्सेस पपुवा न्यु गिनी, को छ बलियो ?

२० जेठ , एजेन्सी ।
आईसीसी टी–२० विश्वकप क्रिकेट प्रतियोगिताको नवौँ संस्करणको दोस्रो खेलमा आज आयोजक वेस्ट इन्डिज र पपुवा न्यु गिनी (पीएनजी)बिच भिड्दैछन् । उक्त खेल क्यारेबियन राष्ट्र गुयनाको जर्जटाउनस्थित प्रोभिडेन्स स्टेडियममा खेलिने छ । वेस्ट इन्डिज र पीएनजीबिचको खेल नेपाली समयअनुसार, राति २०ः१५ बजे सुरु हुनेछ ।

आईसीसीको पछिल्लो टी–२० अन्तर्राष्ट्रिय वरीयतामा वेस्ट इन्डिज चौथो स्थानमा आसीन छ । पीएनजी भने वरीयताको २०औँ स्थानमा छ । टी–२० विश्वकपको नवौँ संस्करणमा खेल्न लागिएको यो दोस्रो खेल हो । यसअघि आइतबार नै डालासमा खेलिएको प्रतियोगिताको उद्घाटन खेलमा आयोजक अमेरिकाले क्यानडालाई सात विकेटले हराएको थियो ।

नवौँ विश्वकपमा वेस्ट इन्डिज र पीएनजी समूह ‘सी’ मा रहेका छन् । त्यो समूहमा न्युजिल्यान्ड, अफगानिस्तान र युगान्डा पनि छन् । वेस्ट इन्डिजले सन् २००७ मा सम्पन्न टी–२० विश्वकपको पहिलो संस्करणदेखि नै निरन्तर रूपमा सहभागिता जनाउँदै आएको छ । पीएनजीको भने टी–२० विश्वकपमा यो दोस्रो सहभागिता हो ।

पीएनजीले यसअघि सन् २०२१ मा पहिलो पटक टी–२० विश्वकप खेलेको थियो । त्यतिबेला पीएनजी प्रतियोगिताको पहिलो चरणबाटै बाहिरिएको थियो । यसपटक विश्वकपमा वेस्ट इन्डिजले आयोजक राष्ट्रका रूपमा सहभागिता जनाएको हो । पीएनजी भने पूर्वी एसिया तथा प्यासिफिक क्षेत्रबाट छनोट चरण पार गर्दै विश्वकपमा उपस्थित भएको हो ।

त्यो क्षेत्रबाट एउटा टोलीमात्र विश्वकपमा छनोट हुने प्रावधान छ । वेस्ट इन्डिजले हालसम्म दुई पटक टी–२० विश्वकपको उपाधि उचालिसकेको छ । वेस्ट इन्डिज दुई पटक टी–२० विश्वकपको उपाधि जित्ने पहिलो राष्ट्र पनि हो । क्यारेबियन टोलीले सन् २०१२ मा पहिलो र सन् २०१६ मा दोस्रो पटक टी–२० विश्वकप जितेको थियो ।

वेस्ट इन्डिजका अतिरिक्त इङ्ल्यान्डले मात्र दुई पटक टी–२० विश्वकपको उपाधि उचाल्न सकेको छ । इङ्ल्यान्डले सन् २०१० र सन् २०२२ मा टी–२० विश्वकप जितेको थियो । यो तथ्याङ्कले पीएनजीको तुलनामा वेस्ट इन्डिजलाई बलियो टोलीको रूपमा स्थापित गराउँछ । वेस्ट इन्डिज र पीएनजीले हालसम्म आपसमा एउटा पनि टी–२० अन्तर्राष्ट्रिय खेल खेलेका छैनन् ।

यस अर्थमा, यही विश्वकपमा यी दुई टोली पहिलो पटक आपसमा भिड्न लागेका हुन् । सन् २०१८ मा यी दुई टोलीबिच एकमात्र एक दिवसीय अन्तर्राष्ट्रिय खेल खेलिएको थियो । त्यो एक दिवसीय अन्तर्राष्ट्रिय खेलमा वेस्ट इन्डिजले पीएनजीलाई ६ विकेटले हराएको थियो । त्यतिबेला आईसीसी एक दिवसीय विश्वकपको छनोट प्रतियोगिताका क्रममा यी दुई टोलीबिच आपसमा भिडन्त भएको थियो । विश्वकपमा नेपालले आफ्नो पहिलो खेल भने मंगलबार नेदरल्यान्ड्ससँग खेल्दैछ ।

 

 

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.