Nepal Times
Nepal Times
3
Shares

दीपेन्द्रसिंह ऐरी कि बास डि लिडेः को बन्ला हिरो ?

दीपेन्द्रसिंह ऐरी कि बास डि लिडेः को बन्ला हिरो ?

२२ जेठ, विराटनगर ।

एक दशकको पर्खाइपछि नेपालले विश्व क्रिकेटको मञ्चमा आफूलाई पुनः उभ्याएको छ । नेपालले २०१४ मा पहिलो पटक ट्वान्टी–२० विश्वकप खेलेको थियो । आज पहिलो खेल नेदरल्यान्डसँग खेल्दै नवौं संस्करणको पुरुषतर्फको आईसीसी ट्वान्टी–२० विश्वकपको ढोका नेपालले खोल्दै छ । गत कात्तिकमा भएको एसिया छनोटमा नेपालले यूएईलाई सेमिफाइनलमा पराजित गर्दै विश्वकपमा स्थान पक्का गरेको थियो ।

नेपाल र ओमान एसिया क्षेत्रबाट विश्वकपका लागि छानिएका हुन । समूह ‘डी’ अन्तर्गतको दोस्रो तथा नेपालको पहिलो खेल अहिले केही बेरमा अर्थात ९ः३० बजे अमेरिकाको डालसस्थित ग्राण्ड प्रेरी रङ्गशालामा हुँदैछ । अमेरिका र वेस्ट इन्डिजमा संयुक्त रूपमा आयोजना भइरहेको यो संस्करण पुरस्कार राशिका कारण पनि अहिलेसम्मकै ठूलो प्रतियोगिता हो ।

नवौं संस्करणको ट्वान्टी–२० विश्वकप विजेताले कम्तीमा २४ लाख ५० हजार डलर पुरस्कार पाउनेछ । ट्वान्टी–२० विश्वकपको इतिहासमा यो अहिलेसम्मकै धेरै हो । उपविजेताले कम्तीमा १२ लाख ८० डलर पाउनेछ ।अघिल्लो संस्करणको भन्दा झन्डै दोब्बर रकम वृद्धि गर्दै कुल १ करोड १२ लाख ५० हजार पुरस्कार राशी राखिएको छ । पछिल्लो संस्करणमा कुल पुरस्कार राशि ५६ लाख डलर मात्र रहेको थियो ।

सेमिफाइनलमा पराजित हुने दुई टोलीले जनही ७ लाख ८७ हजार ५ सय डलर पाउनेछन । सुपर ‘एट’ मा रोकिने प्रत्येक चार टोलीको भागमा ३ लाख ८२ हजार ५ सय पर्नेछ । नवौंदेखि १२ हुने टोलीले २ लाख ४७ हजार ५ सय डलर पाउनेछन । १३ देखि २० औं स्थानमा हुने टोलीले २ लाख २५ हजार पाउनेछन । सेमिफाइनल र फाइनलबाहेक प्रत्येक प्रतिस्पर्धी टोलीले खेलको दिन ३१ हजार १ सय ५४ डलर पाउनेछ ।

यसका साथै अब समूह डी मा रहेको नेपाली टोलीले कम्तीमा २ लाख २५ हजार डलर अर्थात् झण्डै ३ करोड नेपाली रुपैयाँ पाउने पक्कापक्की भएको छ । तर कुनै एउटा खेल जिते थप ४१ लाख नेपाली रुपैयाँको हकदार हुनेछ ।यसरी एक महिनासम्म चल्ने विश्वकप क्रिकेट पुरस्कार राशि ,टिम सहभागिता र अवधिका हिसावले सबैभन्दा महंगो र ठूलो पनि सावित हुने देखिएको छ । दुई देशका ९ वटा रंगशालामा विश्वकप खेलाइनेछ ।

५५ खेल हुने यो प्रतियोगिता वेस्ट इन्डिज र अमेरिकाका नौ रंगशालामा २८ दिनसम्म खेलाइदैछ । जसका कारण यो विश्वकप अहिलेसम्मकै ठूलो बनेको छ । सुपर ८ अघि ४० समूह चरणका खेल हुनेछन् । दुई समूहमा हुने सुपर–८ बाट चार टोली सेमिफाइनल पुग्नेछन् । यो विश्वकपमा अमेरिका र वेस्ट इन्डिजलाई आयोजकको हिसाबमा सोझै प्रवेश दिइएको हो ।

वेस्ट इन्डिज दुई पटकको विजेता हो भने अमेरिका पहिलो पटक विश्वकपमा खेल्न लागेको हो । टेस्ट राष्ट्र जिम्बावेले छनोट चरणमा नामिबिया र युगान्डाको चुनौतीलाई पार गर्न सकेन । सन् २०२२ मा अस्ट्रेलियामा भएको ट्वान्टी–२० विश्वकपमा शीर्ष ८ भित्र रहेका इंग्ल्यान्ड, पाकिस्तान, भारत, न्युजिल्यान्ड, अस्ट्रेलिया, श्रीलंका, दक्षिण अफ्रिका र नेदरल्यान्ड्स यसपटकको विश्वकपका लागि सोझै छनोट भएका राष्ट्र हुन ।

यसबाहेक आईसीसी ट्वान्टी–२० अन्तर्राष्ट्रिय वरीयतामा माथिल्लो स्थानमा रहेका राष्ट्रबाट अफगानिस्तान र बंगलादेश विश्वकपलाई छानिएको थियो । अन्य ८ टोली क्षेत्रीय छनोटबाट छानिएका थिए । युरोपबाट आयरल्यान्ड र स्कटल्यान्ड, एसियाबाट ओमान र नेपाल, अफ्रिकाबाट नामिबिया र युगान्डा, इस्ट एसिया प्यासिफिक क्षेत्रबाट पपुवा न्युगिनी तथा अमेरिकी क्षेत्रबाट क्यानडा विश्वकपका लागि छानिएका हुन ।

अब कुरा गरौं आजको नेपाल र नेदरल्याण्डस्बीचको खेलको । त्यसमा पनि खेलाडी विशेषको कुरा गर्नुपर्दा आज केही खेलाडीले आफ्नो नाम थप चम्काउन सक्छन् । जसमा नेपालकै कुरा गर्नु पर्दा एक नाम हो दीपेन्द्र सिंह ऐरी । खासमा टी–२० क्रिकेटमा कुनै पनि भर हुँदैन । टिम जित्न टोलीका सबै खेलाडीले राम्रो प्रदर्शन गर्नुपर्छ । तर, टी–२० क्रिकेटमा एउटै खेलाडीले एक्लै खेल जिताउन र हराउन सक्छ ।

टोलीमा केही यस्ता खेलाडी हुन्छन् जसले हारको अवस्थाबाट पनि खेल जिताउन सक्ने अद्भूत खुबी राख्छन् । यस्तोमा एक हुन् दीपेन्द्रसिंह ऐरी ।अलराण्डर दीपेन्द्रसिंह ऐरी नेपालका प्रमुख हतियार हुन् । दीपेन्द्रले मध्यक्रम र तल्लोक्रममा ब्याटिङ गर्नुको साथै अफ स्पिन बलिङ गर्ने गर्दछन् । दीपेन्द्र ब्याट र बल मात्रै नभएर फिल्डिङबाट पनि खेल जिताउन सक्ने अद्भूत क्षमता भएका खेलाडी हुन् ।

दीपेन्द्रले अन्तर्राष्ट्रिय टी–२० क्रिकेटमा सानदार प्रदर्शन पनि गर्दै आएका छन् । उनी विश्वको नजरमा आइसकेका खेलाडी हुन् । उनले गत सेप्टेम्बरमा मंगोलियाविरुद्ध ९ बलमा क्रिकेट इतिहासकै सर्वाधिक छिटो अर्धशतक पूरा गरेका थिए । दुई महिनाअघि एसीसी प्रिमियर कपमा कतारविरुद्ध एकै ओभरमा ६ छक्का हानेका थिए । बलिङमा पावर प्ले, मध्यक्रम र डेथ ओभर कुनै पनि समयमा उत्कृष्ट प्रदर्शन गर्दै आएका छन् ।

दीपेन्द्रले नेपालबाट ६४ टी–२० आई खेलमा १ मा शतक र ९ मा अर्धशतकसहित कुल १६२६ रन बनाउनुको साथै ३७ विकेट लिएका छन् । दीपेन्द्र क्रिजमा हुँदासम्म कुनैपनि विपक्षी टोलीलाई डर भइरहन्छ ।उता नेदरल्यान्ड्सका खेलाडीहरुमा बास डि लिडेले बाजी उल्ट्याउन सक्छन् । नेदरल्यान्ड्सका युवा अलराउण्डर बास डि लिडे वर्तमान एशोसिएट क्रिकेटका एक उत्कृष्ट क्रिकेटर हुन् ।

२०२३ मा आईसीसीको एशोसिएट उत्कृष्ट खेलाडीको अवार्ड जितेका थिए । गत वर्ष नेदरल्यान्ड्सलाई २४ वर्षीय उनले ३४ टी–२० आई खेलमा ६७७ रन बनाउनुको साथै ३० विकेट खेल्ने गर्दछन् । सन् २०२१ मा टीयुमा नेदरल्यान्ड्सले नेपालले दिएको २०७ रनको लक्ष्य १९.३ ओभरमा पूरा गर्न लिडेले ८१ रनको अविजित इनिङ खेलेका थिए । लिडेले विदेशी लिगसँगै इंग्ल्यान्डको डरमबाट काउन्ट्री खेल्दै आएका छन् ।

काउन्ट्रीमा सानदार प्रदर्शन गर्दै आएका उनले गत जुलाईमा विश्वकप छनोटको निर्णायक खेलमा स्कटल्यान्डविरुद्ध १२३ रन बनाउनुको साथै ५ विकेट लिंदै टोलीलाई विश्वकपमा पु¥याए । विश्वकपमा पाकिस्तानविरुद्ध उनले ६७ रन बनाउनुको साथै ४ विकेट लिएका थिए ।लिडेसँग विश्वका ठूला टोली र खेलाडीविरुद्ध खेलेको राम्रो अनुभव छ । जसको भरपूर्ण फाइदा उठाउन सक्छन् ।

नेपाललाई घातक बन्न सक्छन् । टी–२० अन्तर्राष्ट्रिय प्रतियोगितामा नेपाल र नेदरल्यान्ड्स एक–अर्काका परिचित प्रतिद्वन्द्वी हुन् । यी दुई राष्ट्रबिच हालसम्म १२ वटा टी–२० अन्तर्राष्ट्रिय खेल खेलिएको छ । ती खेलको नतिजालाई हेर्दा खासै ठूलो अन्तर देखिँदैन । हालसम्म खेलिएको १२ वटा टी–२० प्रतियोगितामध्ये ६ खेलमा नेदरल्यान्ड्स विजयी भएको छ । पाँच खेलमा भने नेपालले नेदरल्यान्ड्सलाई पराजित गरेको छ ।

यी दुई टोलीबिचको एक खेल भने अनिर्णित रुपमा सकिएको छ । अब आज नेपाल १० वर्षपछि पुगेको विश्वकपको मैदानमा नेदरल्यान्ड्सलाई पराजित गर्दै विश्वकपमा नयाँ इतिहास कोर्ने लक्ष्यमा छ । यसबारे तपाइँका टिप्पणी पनि अवस्य व्यक्त गर्नुहोला । ताजा खबरका लागि नेपाल टाइम्स्को अनलाइन पोर्टल डब्लु डब्लु डब्लु डट नेपाल टाइम्स् डट नेटमा गएर हेर्न सक्नु हुनेछ । यसैगरि हाम्रो युट्युव च्यानल र फेसबुक पेज पनि अवस्य भिजिट गर्नुहोला । तपाईले गर्नु भएको लाइक, कमेन्ट, सेयर र सब्क्राइबका लागि धेरै धन्यवाद । नेपाल टाइम्स् हेर्दै गर्नुहोला नमस्कार ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.