Nepal Times
Nepal Times
3
Shares

रासिद खानको नाममा सर्वाधिक छिटो १ सय ५० विकेट

रासिद खानको नाममा सर्वाधिक छिटो १ सय ५० विकेट

११ असार , एजेन्सी ।

अमेरिका र वेस्टइन्डिजमा जारी टी २० विश्वकपमा अफगानिस्तान पहिलो पटक विश्वकपको सेमिफाइनलमा प्रवेश गरेको छ । उच्च लयमा रहेको अफगानिस्तानका कप्तान रासिद खानको कीर्तिमानी बलिङको मद्दतले बंगलादेशलाई हराउँदै अफगानिस्तान टी–२० विश्वकपको सेमिफाइनलमा प्रवेश गरेको हो ।

सुपर ८ को समूह १ अन्तरगतको खेलमा अफगानिस्तान डीएलएस मेथडका आधारमा ८ रनले विजयी बनेको हो । १९ ओभरमा १ सय १४ रनको लक्ष्य पाएको बंगलादेशले १७.५ ओभरमा सबै विकेट गुमाएर १ सय ५ रन मात्र बनाउन सक्यो । बंगलादेशका लागि ओपनर लिट्टन दासले सर्वाधिक ५४ रन बनाए । उनले नटआउट रहँदै ४९ बलमा ५ चौका र १ छक्का प्रहार गरे ।

त्यस्तै तोहिद हृदोयले ९ बलमा १४ रन जोडे । त्यस्तै, सौम्य सरकारले १० बलमा १० रनको योगदान दिए ।कप्तान रासिद खानले घातक बलिङ गर्दै ४ ओभरमा २३ रन खर्चेर ४ विकेट लिए । उनी टी–२० अन्तर्राष्ट्रियमा सबैभन्दा चाँडो १ सय ५० विकेट लिने खेलाडी पनि बने । उनले न्युजिल्यान्डका टीम साउथीको कीर्तिमान तोडेका हुन् ।

रासिदले मात्र ९२ खेलमा १५० विकेटको कीर्तिमान पार गरेका हुन् । खानले २०१५ देखिको २०२४ सम्मको ९२ खेल २ हजार १ सय १४ बलमा १ सय ५२ विकेट लिएका छन् । यस अवधिमा उनले २१ सय ४१ रन जोडेका छन् । टीम साउथीले भने यो कीर्तिमान ११८ खेलमा बनाएका थिए । अहिलेसम्म टिम साउथी १ सय २६ खेलमा १ सय ६४ विकेटका साथ टी २० आईमा सर्वाधिक विकेट लिने खेलाडीको शीर्ष स्थानमा रहेका छन् ।

यो कीर्तिमानी दौडमा नेपालका स्पिनर सन्दीप लामिछानेपनि रहेका छन् । सन्दीपले मात्र ५४ खेलमा सय विकेट पूरा गरेका छन् । तालिका अनुशार टी २० आईमा सय विकेट पूरा गर्ने खेलाडीहरु १६ जना रहेका छन् । बंगलादेशविरुद्धको खेलमा नविन उल हकले पनि ३.५ ओभरमा २६ रन खर्चेर ४ विकेट लिए ।

यसअघि टस जितेर पहिले ब्याटिङ गरेको अफगानिस्तानले निर्धारित २० ओभरमा ५ विकेटको क्षतिमा १ सय १५ रन बनाएको थियो । अफगानिस्तानका लागि ओपनर रहमनुल्लाह गुरबाजले सर्वाधिक ४३ रनको योगदान दिए । उनले ५५ बलमा ३ चौका र १ छक्का हिर्काए । कप्तान रासिद खानले १० बलमा १९ रन जोडे । उनले ३ छक्का प्रहार गरे ।

त्यस्तै, इब्राहिम जादरानले २९ बलमा १८ रन तथा अज्मतुल्लाह ओमरजाईले १२ बलमा १० रन बनाए । कसिलो बलिङ गरेको बंगलादेशका लागि रिसाद होसेनले ३ विकेट लिए । उनले ४ ओभरमा २६ रन खर्चिए । त्यसैगरी तास्किन अहमद र मुस्तफिजुर रहमानले १–१ विकेट लिए । अफगानिस्तानको जितसँगै पूर्वविजेता अस्ट्रेलिया प्रतियोगिताबाट बाहिरिएको छ ।

समूह ए मा भारत ३ खेलमा ३ जितका साथ ६ अंकसहित सेमिफाइनलमा पुगेको छ भने समूह उपविजेता बनेको अफगान ३ खेलमा २ मा जित र एकमा हारसहित ४ अंक जोड्दै सेमिफाइनलमा पुगेको छ । अष्ट्र्लिया ३ खेलमा १ जित र २ हजार सहित २ अंक र बंगलादेश ३ खेलमा ३ हारसहित शुन्य अंकसहित प्रतियोगिताबाट घर फर्किएको छ ।

अफगानिस्तानले अब सेमिफाइनलमा दक्षिण अफ्रिकाको सामना गर्नेछ । अर्को सेमिफाइनलमा भारतले इंग्ल्यान्डसँग खेल्नेछ । पहिलो पटक सेमिफाइनलमा पुगेको अफगानिस्तानले २०१० देखि २०२४ सम्म ७ पटक विश्वकप खेलिसकेको छ । जसमा यसपटक सेमिफाइनलमा प्रवेश गर्नु नै उसको सबैभन्दा ठूलो उपलब्धि हो । विश्वकपमा अफगानिस्तानले खेलेका कुल २९ खेल मध्ये १२ वटामा जित र १९ खेलमा पराजय भोगेको छ ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.