१३ असार, एजेन्सी ।
अमेरिका र वेस्टइन्डिजमा जारी टी २० विश्वकपमा दक्षिण अफ्रिका पहिलो पटक उपाधि नजिक पुगेको छ । अब आज हुने ईंग्ल्यान्ड र भारतको खेल नतिजाले दक्षिण अफ्रिकासँग उपाधिका लागि भिड्ने टिमको टुंगो लाग्नेछ । तर वेस्ट इन्डिजको गुयनास्थित प्रोभिडेन्स रंगशालामा खेल क्षेत्रमा आज वर्षा हुने अनुमानले यो खेलको प्रतिपक्षमा रहेकाहरुलाई चिन्तित तुल्याएको छ ।
वर्षाको संभावनाले सबैभन्दा बढी चिन्तित ईंग्ल्यान्ड बनेको छ । आजको खेल वर्षाका कारण रद्द भए भारत सिँधै फाइनलमा पुग्नेछ भने ईंग्ल्यान्ड घर फर्किनु पर्नेछ । गुयनामा अलिकति आकाश खुल्ने तर वर्षात् पनि हुने अनुमान गरिएको छ । वर्षातको सम्भावना ९० प्रतिशत छ । ६१ प्रतिशत आकाश बादलले ढाकिनेछ भने भिजिविलिटी ६ किलोमिटर मात्र हुनेछ ।
यस्तै, पूर्व दिशाबाट ७ किलोमिटर प्रतिघन्टाको गतिमा हावा चल्ने तथा २० किलोमिटर प्रतिघन्टाको दरमा हुरी पनि चल्न सक्ने जनाइएको छ । यसअघि सुपर ८ मा दुवै टीमबीच कम्तीमा ५–५ ओभरको खेल सम्भव भएमा नतिजा आउन सक्थ्यो । तर, सेमिफाइनलमा नतिजा आउन दुवै टीमले कम्तीमा १०–१० ओभर खेल्नुपर्छ ।
स्थानीय समयअनुसार बिहान १०ः३० मा खेल सुरू हुन्छ । यदि वर्षातले निर्धारित समयमा खेल सुरू हुन सकेन भने २५० मिनेटसम्म तन्काउन सकिने गरी व्यवस्था मिलाइएको छ । अर्थात् यदि २.४० बजेसम्ममा खेल सुरू हुन सक्यो भने ओभर घटाउनु पर्दैन । त्योभन्दा पनि ढिलाइ भएको खण्डमा चाहीँ ओभर घटाउनुपर्छ ।
यदि वर्षाका कारणले १०–१० ओभरको खेल पनि हुन सकेन भने भारत सिधै फाइनलमा पुग्नेछ । खेल रद्द भएको खण्डमा सुपर ८ मा आफ्नो समूहमा पहिलो हुने टिम फाइनलमा पुग्ने प्रावधान पहिल्यै तय गरिएको थियो । यस्तै खेल बराबरीमा टुंगियो र सुपर ओभरबाट पनि नतिजा आएन भने पनि भारत नै फाइनलमा जान्छ ।
भारत र ईंग्ल्यान्डको सेमिफाइनलमा रिजर्भ डे पनि राखिएको छैन । यसअघि दक्षिण अफ्रिका र अफगानिस्तानबीचको पहिलो सेमिफाइनलका लागि भने रिजर्भ डे राखिएको थियो । आईसीसीले भने फाइनल खेलका लागि एक दिन मात्रै बाँकी रहेकाले रिजर्भ डे नराखिएको दाबी गरेको छ ।
यसअघि टी–२० विश्वकप २०२२ को सेमिफाइनलमा इंग्ल्याण्डले भारतलाई १० विकेटले पराजित गरेको थियो । आज २०२२ को बदला लिनका लागि भारतलाई मौका रहेको छ । टी–२० क्रिकेटमा यी दुई टोलीले २३ पटक भिडेका छन् जसमा भारतले १२ खेल जितेको छ भने इङ्ल्यान्डले ११ खेलमा जित हासिल गरेको छ । टी–२० विश्वकपको इतिहासमा भने इङ्ल्यान्डले भारतसँग चार पटक सामना गरेको छ । जहाँ दुवै टोलीले दुई–दुई खेल जितेका छन् ।
