Nepal Times
Nepal Times
3
Shares

एमालेले सरकार छाडेपछि प्रचण्डको पक्षमा रास्वपा

एमालेले सरकार छाडेपछि प्रचण्डको पक्षमा रास्वपा

२० असार, काठमाण्डौ।

अशोक राई नेतृत्वको जनता समाजवादी पार्टी (जसपा)ले पनि नयाँ सत्तासमीकरणका निम्ति नेपाली कांग्रेस र एमालेबीच भएको सहमतिलाई समर्थन गर्ने भएको छ । यसका लागि वर्तमान सरकारमा पार्टीका तर्फबाट सहभागी मन्त्रीहरूलाई आजै राजीनामा दिन निर्देशन दिइने जसपाका महासचिव मोहम्मद इस्तियाक राईले जानकारी दिए ।

प्रतिनिधिसभाका ठूला दुई दलबीच भएको सहमतिलाई जसपाले समर्थन गर्ने उनले बताए । महासचिव राईले भने, “परिवर्तित राजनीतिक घटनाक्रमानुसार वर्तमान सरकार अल्पमतमा परिसकेकाले आफ्नो पार्टीको तर्फबाट सरकारमा सहभागी मन्त्रीलाई राजीनामा गर्न लगाएर नयाँ परिस्थितिअनुरूप पार्टी अगाडि बढ्नेछ । पदाधिकारी बैठक आजै साँझसम्म वा भोलि बिहान बस्नेछ ।”

जसपाका अध्यक्ष राई र नेता राजेन्द्र श्रेष्ठको कार्यव्यस्तताले आज साँझसम्म वा भोलि बिहान ७ बजे बैठक बसेर निर्णय गरिने जनाइएको छ । जसपाबाट वर्तमान सरकारमा दुई मन्त्री र एक राज्यमन्त्री सहभागी छन् । यता एमालेले भने हिजो नै सरकारलाई दिएको समर्थन फिर्ता लिएको छ ।

एमाले अध्यक्ष केपी शर्मा ओलीले प्रधानमन्त्री पुष्पकमल दाहाल प्रचण्डलाई एक पत्र लेखी राष्ट्रिय सरकार गठन गरी राजनीतिक स्थायित्व दिने उद्देश्यले नयाँ सरकार गठनको पहल गरिएको भन्दै सरकारलाई दिएको समर्थन फिर्ता लिएको बताएका छन् । ओलीले सरकारलाई दिएको समर्थन बुधबारकै मितिदेखि लागू हुने गरी फिर्ता गरिएको उल्लेख गरेका छन् ।

समर्थन फिर्ता लिएको पत्रसँगै एमालेबाट मन्त्री बनेका ८ जनाले पनि बुधबार नै प्रधानमन्त्री प्रचण्डलाई राजीनामा बुझाएका छन् । २१ असारमा प्रचण्डले कांग्रेससँग गठबन्धन तोडेर एमालेसँग सहमति गरेपछि एमालेबाट ८ जना मन्त्री सरकारमा सहभागी भएका थिए । एमाले सरकारबाट बाहिरिएसँगै प्रधानमन्त्री पुष्पकमल दाहाल ‘प्रचण्ड’ अल्पमतमा परेका छन् ।

यता राजीनामा दिन आज विहान बालुवाटार गएका राष्ट्रिय स्वतन्त्र पार्टीका मन्त्रीहरु भने नदिइकनै फर्किएका छन् । प्रधानमन्त्री पुष्पकमल दाहालले पछिल्लो अवस्थाका बारेमा जानकारी गराउँदै राजीनामा नदिन आग्रह गरेपछि फिर्ता भएको रास्वपाका प्रमुख सचेतक सन्तोष परियारले जानकारी गराए ।

“हाम्रा मन्त्रीहरु राजीनामा बोकेरै जानुभएको हो, म पनि सँगै गएको थिएँ, प्रधानमन्त्रीले अहिले राजीनामा नदिनुस्, मैले चाँडै नै विश्वासको मत लिन्छु भन्नुभयो । हामी त्यसबेलासम्म पर्खिन्छौँ ।” उनका अनुसार रास्वपाले चाँडै नै विश्वासको मत लिन प्रधानमन्त्रीसँग आग्रह गरेको छ । यस्तै नेकपा एकीकृत समाजवादीका मन्त्रीहरूले राजीनामा नदिने भएका छन् ।

वर्तमान सरकारमा एकीकृत समाजवादीबाट सहभागी दुई मन्त्रीहरूले राजीनामा नदिने पार्टीका प्रवक्ता जगन्नाथ खतिवडाले बताए । प्रधानमन्त्री पुष्पकमल दाहाल ‘प्रचण्ड’लाई आफूहरूको विश्वासको मत रहेको भन्दै उनले मन्त्रीहरूले राजीनामा नदिने बताएका हुन् । एकीकृत समाजवादीबाट सहरी विकास र संघीय मामिला तथा सामान्य प्रशासनसहित २ मन्त्रालय लिएर सरकारमा सहभागी छ । सहरी विकासमन्त्री धनबहादुर बुढा र सामान्य प्रशासन मन्त्रालयमा भानुभक्त जोशी छन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.