२९ असार, एजेन्सी ।
इंग्ल्याण्डका तीव्र गतिका बलर जेम्स एन्डरसनले ४१ वर्षको उमेरमा क्रिकेटलाई गुडबाई भनेका छन् । सन् २००२ मा २० वर्षको उमेरमा एन्डरसनले अन्तर्राष्ट्रिय क्रिकेट सुरु गरेका थिए । टेस्टमा ७०४ विकेट, एकदिवसीयमा २६९ र टी–२० मा १८ गरी उनले करियरमा कुल ९९१ विकेट लिए । २१ वर्षसम्म इङ्ल्यान्ड टोलीको पेस बलिङको नेतृत्व गरेका उनले लर्ड्समा अन्तिम टेस्ट खेलेका हुन् ।
खेल जितेपछि उनी बालकनीमा आए, मैदानमा जम्मा भएका सयौँ फ्यानलाई सम्बोधन गर्दै उनले भने, ‘इङ्ल्यान्डका लागि क्रिकेट खेल्नु संसारकै उत्कृष्ट काम हो ।’ र त्यसपछि अलविदा भने । खेलपछि सम्पूर्ण टोली र पूर्व कप्तान नासिर हुसेन लर्ड्सको ड्रेसिङ रुममा उपस्थित थिए । हुसैनले एन्डरसनलाई भने, ‘तपाईंले इङ्ल्यान्डका लागि जे गर्नुभयो त्यो उत्कृष्ट थियो। सबै कुराका लागि धन्यवाद ।
एन्डरसनले एकदिवसीय करिअरको सुरुवात २००२ मा अस्ट्रेलिया विरुद्धको खेलबाट गरेका थिए । अन्तिम खेल अफगानिस्तान विरुद्ध २०१५ मा खेले । टेस्ट करिअरको सुरुवात २००३ मा जिम्बाब्वे विरुद्ध खेल्दै गरेका थिए । उनले अन्तिम टेस्ट वेस्ट इन्डिजसँगको यही सिरिज रह्यो। टी–२० मा २००७ मा अस्ट्रेलिया विरुद्धको खेलमा डेब्यु गरेका उनले २००९ मा दक्षिण अफ्रिका विरुद्ध अन्तिम खेल खेलेका थिए ।
एन्डरसनको बिदाइका रूपमा रहेको उनको अन्तिम टेस्टमा इंग्ल्यान्डले वेस्ट इन्डिजलाई इनिङ र १ सय १४ रनको फराकिलो अन्तरले हरायो। एन्डरसनले आफ्नो टेस्टको अन्तिम खेलमा समेत ४ विकेट लिए । पहिलो इनिङमा १ विकेट लिएका उनले दोस्रो इनिङमा ३ विकेट लिए । उनी अन्तर्राष्ट्रिय क्रिकेटमा सबैभन्दा धेरै बलिङ गर्ने विश्वको पहिलो तीव्र गतिका बलर पनि बनेका छन् ।
घरेलु मैदानमा वेस्ट इन्डिजसँगको पहिलो टेस्ट क्रिकेटमा एन्डरसनले यो उपलब्धि हासिल गरेका हुन् । उनले अन्तर्राष्ट्रिय क्रिकेटमा ४ सय १ खेलमा ५० हजारभन्दा धेरै पटक बलिङ गरेका हुन् । अन्तर्राष्ट्रिय क्रिकेटमा सबैभन्दा धेरै बलिङ गर्ने बलरको शीर्ष स्थानमा भने श्रीलङ्काका मुथैया मुरलीधन छन् ।
उनले ४ सय ९५ खेलमा ६३ हजार १ सयभन्दा धेरै पटक बलिङ गरेका छन् । यस्तै दोस्रो स्थानमा रहेका भारतका अनिल कुम्ब्लेले ४ सय ३ खेलमा ५५ हजार ३ सयभन्दा धेरै बलिङ गरेका छन् । मुथैया र अनिल दुवै स्पिनर बलर हुन् । एन्डरसन भने तीव्र गतिका बलर हुन् । यसैगरी जेम्स एन्डरसन टेस्ट क्रिकेटमा ४ हजार पटक बलिङ गर्ने चौथो बलर बनेका छन् । यसअघि मुथैया मुरलीधरन, अनिल कुम्ब्ले र अस्ट्रेलियाका शेन वार्नले यो उपलब्धि हासिल गरिसकेका छन् ।
