१२ साउन , एजेन्सी ।
पेरिसमा जारी ३३ औँ गृष्मकालीन ओलम्पिकमा आज दुई नेपाली खेलाडीले प्रतिस्पर्धा गर्दैछन् । टेबल टेनिसका स्यान्टु श्रेष्ठ र ब्याटमिन्टनका प्रिन्स दाहालले आज प्रतिस्पर्धा गर्न लागेका हुन् । प्रारम्भिक चरणमा स्यान्टुले सेनेगलका खेलाडी इब्राहिम डिएवसँग प्रतिस्पर्धा गर्नेछन् । पुरुष एकलमा भिड्ने स्यान्टुको खेल पेरिस एक्पो पोर्ट डे भर्सेल्समा साँझ साढे ७ बजे शुरु हुनेछ ।
नेपाली टेबल टेनिसको इतिहासमा ओलम्पिक खेल्ने स्यान्टु पहिलो खेलाडी हुन् । उनले दक्षिण एसियाली छनोट चरण पार गर्दै ओलम्पिकमा स्थान बनाएका थिए । छनोट चरण पार गरेर ओलम्पिक खेल्ने स्यान्टु तेस्रो नेपाली खेलाडी हुन् । पेरिस ओलम्पिकको कठिन समूहमा परेका ब्याडमिन्टन खेलाडी प्रिन्सले भने आज विश्व नम्बर दुई वरीयता तथा दुईपटकका विश्व च्याम्पियन डेनमार्कका भिक्टोर एक्सेलसनसँग प्रतिस्पर्धा गर्दैछन्।
खेल राति पौने १ बजे शुरु हुनेछ । ब्याडमिन्टन खेलाडी प्रिन्स समूह ‘पी मा परेका छन् । पुरुष सिंगलतर्फ ३६ देशका ४१ खेलाडीबीच १३ वटा समूहमा रहेर प्रारम्भिक चरणमा प्रतिस्पर्धा हुनेछ । प्रिन्सको दोस्रो वरियताका डेनमार्कका भिक्टोरसहित तीनपटक ओलम्पिक खेलिसकेका इजरायलका मिसा जिल्बरमन र आयरल्याण्डका नहत गुएनसँग प्रतिस्पर्धा हुनेछ ।
सन् २०१२, २०१६ र २०२० को ओलम्पिक खेलेका मिसा युरोपियन च्याम्पियनसिपका पदकधारी हुन्। आइरिस गुएन पनि युरोपियन यू–१७ च्याम्पियनसिपका स्वर्ण विजेता हुन् । राउण्ड रोबिनमा प्रतिस्पर्धा गरेपछि समूहका शीर्षस्थानमा रहने खेलाडी नकआउट पुग्नेछन्। प्रत्येक खेल ‘बेष्ट अफ थ्री’मा हुनेछ । ब्याडमिन्टनको प्रतिस्पर्धा पेरिसस्थित पोर्टे डे ला चापेल एरिनामा जुलाई २७ देखि अगष्ट ५ सम्म हुनेछ ।
नेपाल ब्याडमिन्टन संघले समयमै प्रशिक्षकको नाम सिफारिस नगर्दा प्रिन्स पेरिस ओलम्पिकमा प्रशिक्षकविना नै पुगेका छन् । पेरिस ओलम्पिकमा नेपालबाट ७ खेलाडीले प्रतिस्पर्धा गर्दैछन् । जसमा स्यान्टु र प्रिन्ससहित जुडोकी मनिता, एथलेटिक्सकी सन्तोषी श्रेष्ठ, सुटिङकी सुस्मिता नेपाल, पौडीका डुवाना लामा र एलेक्जेन्डर शाह, रहेका छन् ।
यस्तै कन्टिनेन्टर कोटामार्फत ओलम्पिकमा प्रतिस्पर्धा गर्न लागेकी नेपाली जुडो खेलाडी मनिताले पेरिस ओलम्पिकमा ५७ केजीमुनि तौल समूहमा प्रतिस्पर्धा गर्दैछिन्। मनिताले पहिलो चरणमा सर्बियाली खेलाडी मारिका पेरिसिकसँग प्रतिस्पर्धा गर्ने भएकी छिन् । उनको खेल सोमबार च्याम्प–डे–मार्स एरेना म्याट १ मा हुनेछ । यो खेलमा विजयी भए उनले अन्तिम १६ मा स्थान पक्का गर्ने छिन् ।
सुटिङकी सुस्मिता नेपालले पेरिस ओलम्पिकमा १० मिटर एयर राइफलमा प्रतिस्पर्धा गर्नेछिन् । वाइल्ड कार्ड मार्फत स्थान बनाएकी उनले आमन्त्रण कोटामा स्थान बनाएकी हुन । १३औँ दक्षिण एसियाली खेलकुद प्रतियोगिता सागमा १० हजार मिटर दौडमा स्वर्ण जितेकी सन्तोषी श्रेष्ठले पेरिस ओलम्पिकमा महिला म्याराथनमा भाग लिँदैछिन् ।
पौडीका एलेक्जेन्डर (एलेक्स) शाहले पेरिस ओलम्पिकमा १ मिटर फ्री स्टायलमा तथा डुवाना लामाले २०० मिटर फ्रिस्टाइलमा भाग लिनेछिन् । गएराती फ्रान्सको राजधानी पेरिसमा ओलम्पिकको भब्य उद्घाटन समारोह भएको छ । पेरिस ओलम्पिकको इतिहासमा पहिलो पटक उद्घाटन समारोह रङ्गशाला बाहिर नदी किनारमा भएको हो । पेरिस ओलम्पिकमा सहभागी दुई सय देशका १० हजार पाँच सय भन्दा धेरै खेलाडी सेन नदीमा आयोजित परेडमा सवार भएका छन् ।
समारोहमा सेन नदी किनारमा हजारौँ दर्शक उपस्थित थिए । आतिशबाजीसहित चर्चित गायकहरुले प्रस्तुति दिएका छन् । उद्घाटन समारोहमा नेपालको झन्डा टेबलटेनिसका स्यान्टु श्रेष्ठ र जुडोकी मनिता श्रेष्ठ प्रधानले संयुक्त रूपमा बोकेका छन् । पेरिस ओलम्पिक यही साउन २७ गतेसम्म चल्नेछ । औपचारिक उद्घाटन अघि नै फुटबल, ह्यान्डबल, आर्चरीलगायतका खेल शुरु भइसकेका छन् ।
