३२ साउन, विराटनगर ।
यसपालिको माध्यमिक शिक्षा परीक्षा (एसइई) को नतिजाप्रति धेरै विद्यार्थीले चित्त बुझाउन सकेका छैनन् । असन्तुष्ट रहेर पुनर्योगका लागि आवेदन दिने विद्यार्थीहरूको संख्याले पनि । एसइईको नतिजाप्रति धेरैको चित्त नबुझेको प्रष्ट पार्छ ।
राष्ट्रिय परीक्षा बोर्ड, परीक्षा नियन्त्रकको कार्यालयका अनुसार हालसम्म एसइईको नतिजालाई लिएर पुनर्योगका लागि आवदेन दिने विद्यार्थीको संख्या १८ हजार ६१२ रहेको छ । जुन, अरू वर्षको तुलनामा धेरै नै हो । त्यसरी आवेदन दिएकामध्ये अब ३० जनाको नतिजा सार्वजनिक हुन बाँकी रहेको परीक्षा बोर्डले जनाएको छ ।
आवेदनपछि नतिजा ‘क्रसचेक’ गर्दा ८४३ विषयमा नतिजा परिवर्तन भएको छ । यसो भनेको कुल आवेदनको ४.६ प्रतिशत हुन आउँछ । बोर्डले नतिजामा त्रुटि आउनुमा थुप्रै कारण पत्ता लगाएको छ । जसमध्ये मार्कस्लिपमा अंक चढाउँदा र कम्प्युटरमा प्रविष्ट गर्दा सबैभन्दा धेरै अर्थात् १.१४ प्रतिशत त्रुटि देखिएको छ । उत्तरपुस्तिकाबाहिर अंक चढाउँदा ०.९४ प्रतिशत त्रुटि भएको छ ।
बाहिर अंक जोड्दा ०.८७ प्रतिशत र उत्तरपुस्तिका परीक्षणका क्रममा ०.७० प्रतिशत त्रुटि भएको देखिएको छ । परीक्षण गर्दा र जोड्दा दुवैमा भएको त्रुटि ०.०४ प्रतिशत छ । उत्तरपुस्तिकाबाहिर अंक चढाउँदा र जोड्दा ०.९२ प्रतिशत, जोड्दा र प्रविष्ट गर्दा ०.०१ प्रतिशत र परीक्षण गर्दा, अंक चढाउँदा र जोड्दा ०.०१ प्रतिशत त्रुटि देखिएको बोर्डले जनाएको छ ।
यसरी सरसर्ती बाहिरबाट हेर्दा बोर्डको कमजोरीका कारण नतिजामा त्रुटि भयो भन्ने देखिएको छ । तर, परीक्षार्थी आफैंले पनि गलत अंक लेखेका कारण समस्या देखिएको अनि कतै परीक्षणका क्रममा पनि समस्या बोर्डको ठहर छ ।
नतिजा चित्त नबुझेर पुनर्योगका लागि आवदेन दिनेको संख्या यो वर्ष धेरै भए पनि परिवर्तन भएको नतिजा भने गत वर्षको भन्दा थोरै हो । २०७९ सालमा एसइईको नतिजाप्रति चित्त नबुझाई पुनर्योगका लागि तीन हजार ४५६ जनाले आवेदन दिएकोमा ९६४ अर्थात् आवेदनको २५ प्रतिशतको नतिजा परिवर्तन भएको थियो । त्यस्तै २०७८ सालमा ६४१ को आवेदन परेकोमा २९८ अर्थात् ४.९३ प्रतिशतको नतिजा परिवर्तन भएको थियो ।
