३२ साउन, विराटनगर ।
नेपाली कांग्रेसका नेता डा. शेखर कोइरालाले एमाले र कांग्रेसले मात्र संविधान संशोधन गर्न खोजे मुलुकमा जटिलता उत्पन्न हुनसक्ने जोखिम औंल्याएका छन् ।
मोरङको बूढीगंगा गाउँपालिकामा आयोजित एक कार्यक्रममा बोल्दै डा. कोइरालाले दुई दलको मात्र हठले संविधान संशोधन हुन नसक्ने बताएका हुन् ।
सर्वसहमतिमा नै संविधान संशोधन गर्नुपर्ने सुझाव दिँदै कोइरालाले भने, ‘कांग्रेस-एमालेको करिब दुई तिहाइ बहुमत छ । तर पनि सबैको सहमतिमा नै संविधान संशोधन गर्नुपर्छ । दुई दलमात्रै मिलेर संविधान संशोधन गर्न खोजे अवस्था झन् जटिल हुन्छ ।’
संविधान संशोधनका लागि जनमत संग्रहजस्तो जटिल प्रक्रियामा जानुको सट्टा संसदीय विशेष समिति वा आयोग बनाएर गर्न सकिने उनले बताए ।