८ भदौ, विराटनगर ।
विपद्बाट प्रभावित बनेकाहरूले आफ्नो प्रदेशको सरकार भन्दा अर्कै ठाउँको स्थानीय तहको मेयरबाट धेरै सहयोग पाउनु भनेको अचम्मकै कुरा हो । हो, अहिले थामेका बाढी प्रभावितलाई पनि अचम्मै लागेको हुनुपर्छ ।
किनकि, सोलुखुम्बुको खुम्बु पासाङल्हामु गाउँपालिका–५ थामे खोलामा आएको बाढीबाट प्रभावितले प्रदेश सरकारको भन्दा ठूलो सहयोग मेयरबाट पाएका छन् । उनीहरूले काठमाडौं महानगरपालिकाका मेयर बालेन्द्र शाहबाट राहत तथा पुनःस्थापनाका लागि २० लाख रुपैयाँ सहयोग पाउने भएका छन् ।
जबकि, कोशी प्रदेश सरकार भने थामेका बाढी प्रभावितलाई डेढ लाख रुपैयाँको सामग्री बोकेर पुगेको थियो, ती सामग्री पनि अतिआवश्यकीय थिएनन् ! थामेका बाढी प्रभावितलाई राहत दिन दुई मन्त्रीसहितको जम्बो टोली पुगेको थियो । कोशी प्रदेश सरकारका दुई मन्त्रीसहितको १४ जनाको टोली डेढ लाख रुपैयाँ बराबरको राहत बोकेर सल्लेरी पुगेको थियो ।
कोशी सरकारका खानेपानी सिंचाई तथा उर्जामन्त्री एकराज कार्की र आन्तरिक मामिला तथा कानुन मन्त्री लिलावल्लव अधिकारीसहितको टोलीजम्मा डेढ लाख रुपैयाँ बराबरको राहत बोकेर सोलुखुम्बु पुगेको हो । विराटनगरबाट दुई दिनअघि हिंडेको टोलीमा प्रदेश सरकारका कर्मचारी, सुरक्षाकर्मी र एमालेका कार्यकर्तासमेत थिए ।
आइतबार साँझ सोलुखुम्बु पुगेको टोलीले सोमबार बिहान सोलुखुम्बुका प्रमुख जिल्ला अधिकारी देवी पाण्डे खत्रीलाई राहत सामग्री हस्तान्तरण गरेर विराटनगर फर्किएको हो । पीडितलाई तत्काल चाहिने र अतिआवश्यक वस्तु माग गरिएको भएपनि मन्त्रीहरू सिरक, म्याट्रेस र तन्ना बोकेर पुगेका थिए ।तर, यता बालेन नेतृत्वको काठमाडौँ महानगरपालिकाले थामेका बाढी प्रभावितलाई २० लाख रुपैयाँ सहयोग गर्ने निर्णय गरेको हो । शुक्रबार बसेको महानगर प्रमुख बालेन्द्र शाह नेतृत्वको विपद् व्यवस्थापन समितिको बैठकले यस्तो निर्णय गरेको हो ।
महानगरले बाढीबाट प्रभावितहरूका लागि खुम्बु पासाङ् ल्हामु गाउँपालिकाको कोषमा २० लाख रुपैयाँ सहयोग गरिदिने छ ।
गत साउन ३२ गते खुम्बु क्षेत्रका हिमताल फुटेर थामे खोलामा आएको बाढीका कारण थामे गाउँका एउटा विद्यालय, एउटा स्वास्थ्य चौकी, २ वटा होटल, १३ वटा घर पूर्ण र १० वटा घरमा आंशिक रूपमा क्षति भएको थियो ।
