९ भदौ, विराटनगर ।
सिन्धुलफको गोलन्जो गाउँपालिका-१ स्थित सुनकाेसी नदीमा शनिबार साँझ बेपत्ता भएको गाडी फेला परेकाे छ ।
खोटाङको हलेसी दर्शन गरेर भक्तपुर फर्कँदै गरेको प्रदेश ३-०१०२३ च ६३६६ नम्बरकाे हिजो साँझ गाडी गाेलन्जाेर-१ कुँडुले नजिकबाट सुनकोसी नदीमा खसेकाे थियाे ।
सो दुर्घटनामा गाडीमा सवार चार जनामध्ये तीन जना बेपत्ता भएका थिए भने एक जना गाडीबाट हामफालेर बाँच्न सफल भए । दुर्घटनामा सूर्यविनायक नगरपालिका भक्तपुर जगातीका २७ वर्षीय सुशान्त कक्षपति भने हामफालेर बाँच्न सफल भएका थिए ।
तथापि, उनी घाइते छन् । उनको सुनकोसी सामुदायिक अस्पताल खुर्कोटमा उपचार भइरहेको छ ।
नदिमा बेपत्ता गाडी गएराति २ बजेतिर निकालिए पनि बेपत्ता तीन जना भने अझै फेला परेका छैनन् ।
सिन्धुली प्रहरी प्रमुख गाेविन्दराज काफ्लेका अनुसार बेपत्ता हुनेहरूमा गाडीका चालक सूर्यविनायक नगरपालिका भक्तपुर जगातीका ३२ वर्षीय अविन बाँके, साेही ठाउँका ३० वर्षीय प्रनित स्यागु र ३७ वर्षीय बलराम घटुवा रहेका छन् ।
प्रहरी उपरीक्षक काफ्लेका अनुसार सशस्त्र प्रहरीकाे गाेताखाेर टाेलीले राति नै गाडी पत्ता लगाएर नदीबाट बाहिर निकालिएको थियो ।
बेपत्ताहरूकाे आइतबार पनि बिहानैदेखि खाेजी कार्य भइरहेकाे प्रहरीले जनाएको छ ।
