११ भदौ, विराटनगर ।
मोरङको विराटनगरमा आज धार्मिक एवम् ऐतिहासिक महत्त्वको राधाकृष्ण रथयात्रा निकालिँदै छ । श्रीकृष्ण जन्माष्टमीको भोलिपल्ट विराटनगरमा हरेक वर्ष रथयात्रा निकालिन्छ ।
प्रत्येक वर्ष विराटनगरमा निकालिँदै आएको रथयात्रा दक्षिण एसियाकै दोस्रो ठुलो रथयात्राका रूपमा परिचित छ । रथयात्राका अवसरमा कोशी प्रदेश सरकारले सार्वजनिक बिदा दिएको छ ।
विश्व हिन्दू समुदायमा विराटनगरको रथयात्रालाई चिनाउनेगरी निकालिन लागिएको श्रीराधाकृष्ण रथयात्रा आयोजक समितिका संयोजक कैलाश रेग्मीले जानकारी दिए ।
कोशी प्रदेशसहित नेपाल र भारतका पाँच लाखभन्दा बढी भक्तजनहरूले श्रीराधाकृष्ण रथयात्राको अवलोकन गर्ने आँकलन गरिएको रथयात्रा आयोजक समितिका सचिव कृष्ण कार्कीले बताएका छन् ।
आज विराटनगर महानगरपालिका–१ स्थित पानीट्यांकीबाट निस्कने रथयात्रा नगर क्षेत्रको विभिन्न ४३ स्थानमा रोकेर पुनः मन्दिरमा पुगेर समापन हुने छ ।
१९८९ सालबाट सुरु भएको खटयात्रालाई विकाश र परिमार्जन गर्दै २०२५ सालदेखि विराटनगरमा राधाकृष्ण रथयात्राको रूपमा प्रदर्शन गरिँदै आएको छ । यो ९३औं संस्करणको रथयात्रा हो ।
यसपटकको रथयात्रा पनि अघिल्लो वर्षझैं पानी ट्याङकीस्थित राधाकृष्ण मन्दिरबाट सुरु गरेर तीनपैनी, गोल्छाचोक, जलजला चोक, ट्राफिक चोक, रोडशेष, बसपार्क, महेन्द्र चोक, शनिमन्दिर, भृकुटी चोक र बरगाछीबाट दुर्गा चोक हुँदै पुनः मन्दिरमा पुगेर समापन हुने आयोजकले जनाएको छ ।
यसपालिको रथयात्राको शुभारम्भ कोशी प्रदेशकका मुख्यमन्त्री हिक्मतकुमार कार्की, विराटनगर महानगर प्रमुख नागेश कोइराला र उपप्रमुख शिल्पा निरला कार्कीलगायतले गर्ने आयोजक समितिका अध्यक्ष रेग्मीले जानकारी दिए ।
‘मुख्यमन्त्री कार्की प्रमुख अतिथिका रूपमा शुभारम्भ कार्यक्रममा आउनुहुनेछ भने मेयर कोइराला संरक्षकका रूपमा हुनुहुनेछ,’ उनले भने, ‘अघिल्लो वर्ष उल्लेख्य रूपमा भक्तजनले अवलोकन गर्नुभएको थियो । यसपालि अझै बढ्ने हाम्रो आँकलन छ ।’
