११ भदौ ,विराटनगर ।
श्रीकृष्ण जन्माष्टमीको भोलिपल्ट आज विराटनगरमा राधाकृष्ण रथ यात्रा निकालिँदै छ । दक्षिण एसियाकै ठूलो भनिने राधाकृष्ण रथयात्रामा सहभागी हुनका लागि लाखौँको सङ्ख्यामा भक्तजनको सहभागिता हुने गरेको छ ।
रथयात्रामा सहभागी हुनका लागि भारतका विभिन्न स्थानबाट भक्तजन विराटनगरमा भेला भइरहेका छन् । श्रीकृष्ण जन्माष्टमीको भोलिपल्ट निकालिने रथयात्राका लागि प्रदेश सरकारले प्रदेशभर सार्वजनिक बिदा दिएको छ ।
विराटनगरमा विक्रम संवत् १९८८ सालदेखि ‘खट’ यात्राबाट सुरु भएको थियो । सो घट यात्रालाई अहिले राधाकृष्ण रथ यात्राका रूपमा मनाउने गरिएको छ ण् । २०२५ सालबाट खटसँगै रथयात्रा निकाल्न थालिएको हो ।
यस पटक विराटनगरमा निकालिने खटको ९३ औँ र रथको ५६ औँ संस्करण हो ।विराटनगर महानगरपालिका–१ स्थित राधाकृष्ण मन्दिरबाट राधाकृष्णको युगल जोडीसहितको रथ निकालिन्छ ।
रथयात्राले बजार क्षेत्रको ९ किलोमिटर यात्रा तय गर्ने छ । राधाकृष्ण मन्दिर परिसरबाट निकालिने रथयात्रा तीनपैन, मेन रोड, ट्राफिक चोक, रोड शेष चोक, महेन्द्र चोक, धरान रोड, बरगाछी हुँदै पुनः मन्दिर परिसरमा पुगेर समापन हुनेछ ।
रथ यात्रा आज दिउँसो साढे ३ बजे राधाकृष्ण मन्दिरदेखि सुरु हुने आयोजकले जनाएको छ । कोशी प्रदेशसहित नेपाल र भारतका पाँच लाखभन्दा बढी भक्तजनहरूले श्रीराधाकृष्ण रथयात्राको अवलोकन गर्ने आँकलन गरिएको रथयात्रा आयोजक समितिका सचिव कृष्ण कार्कीले बताएका छन् ।
रथयात्रा नगर क्षेत्रको विभिन्न ४३ स्थानमा रोकेर पुनः मन्दिरमा पुगेर समापन हुने छ । राधाकृष्ण रथयात्रालाई लक्षित गरेर प्रहरीले उच्च सुरक्षा सतर्कता अपनाएको छ । राधाकृष्ण रथयात्रा हेर्न पूर्वी नेपालसहित छिमेकी मुलुक भारतका विभिन्न स्थानबाट हजारौँ भक्तजन आउने गरेका छन् ।
रथयात्रालाई भव्य, सुरक्षित र मर्यादित बनाउन ठुलो सङ्ख्यामा नेपाल र सशस्त्र प्रहरी परिचालन गरिएको छ । सादा पोसाकका र हतियारसहितका सुरक्षाकर्मी परिचालन गरिएको मोरङ प्रहरी प्रमुख नवराज कार्कीले जानकारी दिए ।
प्रहरीले करिब १ महिना अघिदेखि नै रथयात्रा लक्षित सुरक्षा तयारी थालेको थियो । यात्राका क्रममा हुनसक्ने चोरी, पकेटमारी र लुटपाट केन्द्रित गरेर प्रहरी सक्रियता बढाइएको हो ।
यसपालिको रथयात्राको शुभारम्भ कोशी प्रदेशकका मुख्यमन्त्री हिक्मतकुमार कार्की, विराटनगर महानगर प्रमुख नागेश कोइराला र उपप्रमुख शिल्पा निरला कार्कीलगायतले गर्ने आयोजक समितिले जनाएको छ ।
