११ भदौ, विराटनगर ।
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले संसदका दुई ठुला दल नेपाली कांग्रेस र नेकपा एमालेलाई अब आफ्नो पार्टी सत्ताको खेलमा नभएको प्रष्ट पारेका छन् । मंगलबारको प्रतिनिधिसभाको बैठकमा बोल्नेक्रममा प्रचण्डले माओवादी सरकारको चलखेलको प्रतिरोधमा रहने पनि स्पष्ट पारेका छन् ।
उनले भने, ‘कांग्रेस–एमालेका साथीहरुलाई म यही रोस्टमबाट सम्बोधन गर्दछु, प्रचण्ड अब सत्ताको खेलमा लाग्नेछैन, तपाईहरुकहाँ सत्तामा हिस्सेदारी माग्न आउनेछैन । माओवादी पार्टी होइन, आन्दोलन हो । आन्दोलनको पुनर्गठनमा हामी जुटेका छौं । त्यही पुनर्गठनको बलमा भोलि माओवादी एक्लैले सरकारको नेतृत्व गर्ने तहमा पार्टी बनाउँछौं । पहिला पनि बनाएका हौं । अब पनि बनाउँछौं, त्यो बेलासम्म तपाईंहरू मिलिराख्नुहोला । फेरि बीचैमा झगडा गरेर लौन प्रचण्डजी फकाउन र फुर्क्याउन चाहिँ नआइदिनुहोला !’
अध्यक्ष प्रचण्डले आफूहरू जनताको ठूलो निगरानीमा रहेको पनि बताए ।
