१४ भदौ, विराटनगर ।
कोशी प्रदेशसभा बैठक आज दिउँसो १ बजेका लागि बोलाइएको छ । चालू आर्थिक वर्षको बजेट पारित गरेपछि असार ८ गते स्थगित भएको प्रदेशसभाको बैठक दुई महिनापछि आज बस्न लागेको हो ।
आजका लागि कोशी प्रदेशसभाका सभामुख अम्बरबहारदु विष्टले प्रदेशसभा बैठक डाकेका छन् । नेकपा माओवादी केन्द्र र सत्तारूढ नेकपा एमालेले पनि असन्तुष्टि व्यक्त गरेपछि बैठक डाकिएको हो ।
यसअघि भने सभामुख विष्टले भने नेपाली कांग्रेस सरकारमा सहभागी भइनसकेकाले उसलाई सत्तापक्षमा राखि कि प्रतिपक्षमा राख्ने समस्या हुने भन्दै बैठक राख्न आनाकानी गर्दै आएका थिए । तर, आजको प्रदेश सभामा नेपाली कांग्रेस सत्ता पक्षमा बस्न भएको छ ।
कांग्रेस कोशी प्रदेशसभा संसदीय दलका प्रमुख सचेतक गोपाल तामाङले कांग्रेस सत्ता पक्षमा बस्ने बताएका छन् । कोशी प्रदेशमा अहिलेसम्म नेपाली कांग्रेस सरकारमा सहभागी भएको छैन ।
सरकारमा सहभागी हुने निर्णय गरे पनि कांग्रेसले मन्त्रीकाे नाम भने पठाउन सकेकाे छैन । पूर्वसहमतिअनुसार सत्तापक्षमा बस्ने र मन्त्रीको नाम केन्द्रीय समितिको बैठकपछि मात्रै पठाउने कांग्रेस संसदीय दलका नेता उद्धव थापाले बताए ।
कोशी प्रदेशसभा सचिवालयमा तीनवटा विधेयक दर्ता छन् ।
