१४ भदौ ,एजेन्सी ।
नेपाली छात्रामाथि गोली हानी हत्या गरेको आरोपमा अमेरिकी प्रहरीले प्रौढ उमेरका एक पुरुषलाई समातेर अदालत पु¥याएको छ । नेपाली युवती मुना पाण्डेको छातीमा गोली प्रहार गरी हत्या गरेको अभियोगमा अमेरिकी प्रहरीले टेक्सास राज्यबाट ५१ वर्षीय बविसिंह शाहलाई पक्राउ गरेको थियो ।
२१ वर्षीया मुनाको हत्याका अभियोगमा प्रहरीले शाहलाई गत बुधबार राति ८ बजेतिर पक्राउ गरेको थियो । उनलाई हत्याको अभियोग लगाएर प्रहरीले बिहीबार दिउँसो अदालतमा पेस गरेको थियो । सिसिटिभी फुटेजसहित बलियो प्रमाण जुटाएर अदालत पु¥याइएका कारण शाह थुनामै छन् ।
अब,उनको सुनुवाई मंगलबार बिहान हुने अन्तर्राष्ट्रिय सञ्चारमाध्यमले उल्लेख गरेका छन् । उनलाई जघन्य हत्याको आरोप लगाइएको अमेरिकी सञ्चारमाध्यमहरुले जनाएका छन् । जघन्य हत्या अभियोगमा अमेरिकामा मृत्युदण्डसम्मको सजाय हुन सक्ने कानुनी व्यवस्था रहेको छ ।
भोजपुर घर भएकी पाण्डेको अमेरिकाको टेक्सासस्थित ह्युस्टन सहरमा गोली हानी हत्या भएको थियो । उनको गत शनिबार हत्या भएको बताइएको छ । तर, सोमबार स्थानीय समयअनुसार साँझ ५ः४५ बजेतिर उनको शव ओछ्यानमा भेटिएको थियो ।
अनुसन्धानकर्ताहरूका अनुसार दुईवटा गोलीले उनको छाती प्वाल परेको थियो भने टाउकोको पछिल्लो भागमा एक गोली लागेको थियो । पाण्डेलाई उनकै अपार्टमेन्टको कोठाभित्रै पसेर गोली हानेको पुष्टि भएको थियो ।
अपार्टमेण्टका कर्मचारीहरूका अनुसार सोमबार अपराह्न अज्ञात व्यक्तिले फोन गरेर कोठाभित्र लास भएको जानकारी दिएको थियो ।त्यसपछि अपार्टमेन्टका कर्मचारीले प्रहरीलाई खबर गरेका थिए । हयुस्टन पुलिस डिपार्टमेन्टले ६३६३ वेष्ट एयरपोर्ट ब्लुवर्डमा गत सोमबार साँझ ५ः३५ बजे पाण्डेको शव उनकै अपार्टमेन्टमा फेला पारेको थियो।
तर, त्यसबेला प्रहरीले मुनाको फोन भने भेटेको थिएन । मुनाकी साथीका अनुसार उनको फोनमा हत्या हुनुभन्दा दुई दिन अघिदेखि सम्पर्क हुन सकेको थिएन । जन्मदिनको पार्टीका लागि मुनालाई शनिबार नै फोन गर्दा फोन नलागेको उनकी साथीले प्रहरीलाई बयान दिएकी छन् ।
मुनाले काम गर्ने गरेको मोबाइल फोन स्टोरका सञ्चालकले पनि उनी काममा नआएका कारण सोही दिन फोन सम्पर्क गरेका थिए । यसबाट पनि मुनाको शनिबार नै हत्या भएको हुन सक्ने आँकलन गरिएको छ । अनुसन्धानका क्रममा फेला परेको सिसिटिभी फुटेजका आधारमा प्रहरीले प्रौढ उमेरका शाहलाई पक्राउ गरेको हो।
पाण्डेको हत्याका अभियोगमा शाहलाई ह्युस्टन प्रहरीले बुधबार ट्राफिक जामको समयमा पक्राउ गरेको थियो । उनको नाम र तस्बिरसमेत सार्वजनिक भएको छ । ह्युस्टन प्रहरीले शनिबार पश्चिम ब्युलवार्ड एयरपोर्ट नजिक रहेको मुनाको अपार्टमेन्टबाट एक प्रौढ उमेरका पुरुष बाहिरिँदै गरेको सिसीटिभी फुटेज सार्वजनिक गरेको थियो ।
यसअघि मुनाकै प्रेमीले उनको हत्या गरेको आँकलन गरिएको थियो ।तर, प्रौढ उमेरका सिंहले के कारणले गर्दा मुनाको हत्या गरे र उनीहरूबीचको सम्बन्ध के थियो भन्ने विषय अझै खुलिसकेको छैन् । मुना केही समय अमेरिकी युवकसँग डेटिङमा रहेको आशंका गरिएको छ ।
कोठाभित्र भेटिएका पुरुषले प्रयोग गर्ने फिटनेसका सामानले त्यहाँ कोही पुरुषसमेत बस्ने शंका गरिएको थियो । तर, प्रौढ उमेरका शाह पक्राउ परेपछि भने मुनाका प्रेमी शंकाको घेराबाट अलग भएका छन् । तथापि, यसबारे अमेरिकी प्रहरीले अनुसन्धान गरिरहेकै कारण पनि अहिले भनिसक्ने अवस्था छैन् ।
मुना एफ वान भिसामा ‘इन्टरनेसनल स्टुडेण्ट’को रुपमा सन् २०२१ मा स्नातक तह अध्ययनका लागि अमेरिका गएकी थिइन् । विद्यार्थी भिसामा अमेरिका गएकी उनी ह्युस्टन कम्युनिटी कलेजमा अध्ययनरत थिइन् । त्यसबाहेक उनले स्थानीय मोबाइल स्टोरमा समेत काम गर्दै आएकी थिइन् ।
मुनाकी आमा अनिता आफ्ना श्रीमानसँग छुट्एिर एक्लै बस्न थालेकी थिइन् । अनिता भोजपुरबाट इटहरी हुँदै पछिल्लो समय काठमाडौं काँडाघारीमा बस्दै आएकी छिन् । मुना पनि आमासँगै बस्दै आएकी थिइन् ।
तीन वर्षअघि अमेरिका गएकी उनस् पढाइ सकेर एक वर्षमात्रै घर आउने योजनामा थिइन्, तर मुना अब कहिल्यै घर नआउने गरी बिदा भइन् ।
