१८ भदौ, विराटनगर ।
सरकारका प्रवक्ता तथा सूचना तथा सञ्चारमन्त्री पृथ्वीसुब्बा गुरुङको अभिव्यक्तिप्रतिलाई लिएर नेपाली कांग्रेसका सांसद रामहरि खतिवडाले आपत्ति जनाएका छन् ।
प्रतिनिधिसभाको मंगलबार बैठकमा बोल्दै सांसद खतिवडाले आफू सत्तापक्षकै भए पनि मन्त्री गुरुङको अभिव्यक्ति आपत्तिजनक रहेको बताए ।
एमालेका उपमहासचिवसमेत रहेका गुरुङले शनिबार प्रेस चौतारीले पोखरामा गरेको कार्यक्रममा बोल्दै प्रहरी समायोजनको विषयलाई लिएर ‘आईजीपीको जिब्रो थुत्नुपर्ने’ अभिव्यक्ति दिएका थिए ।
सोही विषयमा बोल्दै सांसद खतिवडाले त्यसबारेमा सदनमा जवाफ दिन पनि माग गरे । प्रतिनिधिसभाको आकस्मिक समयमा बोल्दै खतिवडाले मन्त्रीहरूलाई बोल्दा जिब्रोमा ब्रेक लगाउन सुझाव दिए ।‘म सत्तापक्षकै सांसद हुँ, तर माननीय सूचना तथा संचारमन्त्रीज्यूले केही दिन पहिले नपाल प्रहरीका आइजीपीको जिब्रो थुत्नुपर्छ भनेर अभिव्यक्ति दिनुभएछ । यो अभिव्यक्ति आपत्तिजनक छ,’ खतिवडाले भने ।
‘मन्त्रीहरूलाई अनुरोध गर्न चाहान्छु– जिब्रोमा ब्रेक लगाइयोस् । अन्त कहाँकहाँ लगाउनुपर्ने हो ब्रेक, लाग्दै गर्ला । तर, मन्त्रीहरूले जिब्रोमा ब्रेक लगाएर बोल्ने गरियोस् । यसको जवाफ संसदमा दिइयोस्,’ उनले थपे ।
