१८ भदौ, विराटनगर ।
नयाँ सिजनको ला लिगामा बार्सिलोनाले आफ्नो सशक्त प्रदर्शनलाई कायमै राखिरहेको छ । युवा प्रतिभावान खेलाडीलाई समावेश गरी सन्तुलित टोली बनाएर तारिफयोग्य प्रदर्शन गरिरहेको छ, बार्सिलोनाले ।
सुरुआती खेलहरूमा शतप्रतिशत नतिजा आत्मात् गरेको स्पेनिस महारथी बार्सिलोनाले थप एक युवा खेलाडी अनुबन्ध गर्ने तयारी गरेको छ ।
बार्सिलोनाले दोस्रो घानियन खेलाडीका रूपमा अब्दुल अजाम इसाहलाई अनुबन्ध गर्ने भएको हो । यसअघि बार्सिलोनाले आफ्नो तेस्रो डिभिजन क्लबका लागि घानाकै डेभिड ओडुरोलाई अघिल्लो सातामात्र भित्र्याएको थियो ।
उनी बार्सिलोनामा अनुबन्ध भएका घानाका पहिलो खेलाडीसमेत बनेका थिए । यसअघि बार्सिलोनाले घानाका कुनै पनि खेलाडीलाई भित्र्याएको थिएन ।अब, उसले १८ वर्षीय अब्दुल अजामलाई घानाकै ड्रिम्स एफसीबाट फ्रि ट्रान्सफरमा अनुबन्ध गर्न लागेको हो । उनले पछिल्लो दुई सिजनयता घानियन प्रिमियर लिग खेलिरहेका छन् ।
त्यसबाहेक उनले अफ्रिकाको दोस्रो डिभिजनको सिएएफ कन्फेडेरेसन कप खेलिसकेका छन् ।
