२० भदौ, विराटनगर ।
हालै फ्रान्सको राजधानी पेरिसमा सम्पन्न ओलम्पिकमा प्रतिस्पर्धा गरेकी युगान्डाकी धाविका रेबिका चेप्टेगीको निधन भएको छ । बिहीबार (आज) उपचारका क्रममा ३३ वर्षीया धाविकाको मृत्यु भएको ‘द गार्जियन‘ ले लेखेको छ ।
आइतबार उनका ब्वाइफ्रेन्डले ज्युँदै जलाउँदा रेबिका गम्भीर घाइते भएकी थिइन् । शरीरको ८० प्रतिशत भाग जलेपछि केनियन अस्पतालमा उपचाररत रहेकी रेबिकाको बिहीबार मृत्यु भएको हो ।
ब्वाइफ्रेन्डले पेट्रोल खन्याएर जलाइदिएपछि रेबिकालाई केनियाको इल्डोरेट सहरस्थित मोइ टिचिङ अस्पताल पुर्याइएको थियो । त्यहाँ उपचार सम्भव नभएपछि केनियन अस्पतालमा उपचारका क्रममा उनको निधन भएको अस्पतालका प्रवक्ता अवेन मिनाचले जानकारी दिए ।
युगान्डाको ओलम्पिक्स कमिटीका अध्यक्ष डोनाल्ड राकुरेले सामाजिक सञ्जाल एक्समार्फत् महान खेलाडी रेबिकाको निधन भएको पुष्टि गरे ।
रेबिकालाई पेट्रोल खन्याएर जलाउँदा ब्वाइफ्रेन्ड डिकसन एनडिमा पनि जलेका छन् । उनको अवस्था पनि गम्भीर रहेको ट्रान्स-एनजोइया काउन्टी प्रहरीका कमान्डर जेरेमिया ओले कोसियमले जानकारी दिएका छन् ।
रेबिकाको ज्यान गएको अस्पतालमै उनका ब्वाइफ्रेन्ड एनडिमाको पनि उपचार भइरहेको प्रहरीले जनाएको छ ।
गत महिनामात्र सम्पन्न भएको पेरिस ओलम्पिकको म्यारथन उनले ४४औं स्थानमा रहेर पूरा गरेकी थिइन् । गत वर्ष बुडापेस्टमा भएको वर्ल्ड च्याम्पियनसिपमा उनले १४ औं स्थानमा रहेर दौड पूरा गरेकी थिइन् ।
सन् २०२२ मा थाइल्यान्डमा भएको वर्ल्ड माउन्टेन र ट्रेल रनिङ च्याम्पियनमा भने उनी माउन्टेन रेसको विजेता बनेकी थिइन् ।
