२० भदौ, विराटनगर ।
बार्सिलोनाका युवा स्टार लामिन यमलले हालैमात्र रियल मड्रिडमा आबद्ध भएका किलियन एम्बाप्पेलाई उछिन्दै नयाँ कीर्तिमान बनाएका छन् । विश्वकप विजेता फ्रान्सेली एम्बाप्पेलाई उछिन्दै स्पेनिस खेलाडी यमल बालोन डी’ओर मनोनयनमा पर्ने सर्वाधिक कान्छो खेलाडी बनेका हुन् ।
स्पेनलाई युरो कप जिताउन अहम् भूमिका निभाएका यमल १७ वर्ष ५३ दिन छँदा बालोन डी’ओर को मनोनयनमा परेका हुन् । यसअघि एम्बाप्पे १८ वर्ष २९३ दिनको दिन बालोन डी’ओरको मनोनयनमा परेका थिए । २०१७ को बालोन डी’ओर को मनोनयनमा एम्बाप्पे परेका थिए ।
बुधबार राति फुटबलको सर्वाधिक प्रतिष्ठित पुरस्कार बालोन डी‘ओर का लागि मनोनयन सार्वजनिक भएको थियो । फुटबलको प्रसिद्ध अवार्ड संस्थापक ‘फ्रान्स म्यागजिन’ले वर्ष २०२४ को अवार्डका लागि ३० खेलाडीको नामावली सार्वजनिक गरेको थियो ।
६८औं संस्करणको उक्त अवार्डका लागि वर्षभरि उत्कृष्ट प्रदर्शन गरेका खेलाडीमध्ये यमल पनि परेका हुन् । यमलसँगसँगै एम्बाप्पे पनि बालोन डी’ओर को मनोनयनमा छन् ।
यमल हालै सम्पन्न युरो कपमा उत्कृष्ट युवा खेलाडी घोषित भएका थिए ।
