२२ भदौ, एजेन्सी ।
केभिन डी ब्रुयन प्रेरित बेल्जियमले चौथो संस्करणको युरोपियन नेसन्स लिगमा विजयी सुरुआत गरेको छ । युरोपियन फुटबल महासंघको आयोजनामा जारी प्रतियोगिताअन्तर्गत शुक्रबार राति समूह चरणको पहिलो खेल खेलेको बेल्जियमले इजराइललाई ३-१ गोलले हरायो ।
बेल्जियमलाई जिताउन केभिन डी ब्रुयनले दुई गोल गर्दा युरी टाइलेमान्सले एक गोल गरे । इजराइलले भने एउटा आत्मघाती गोल उपहारमा पाएको थियो ।
खेलको २१औं मिनेटमा ब्रुयनले गोल गर्दै बेल्जियमलाई सुरुआती अग्रता दिलाएका थिए । खेलको ३६औं मिनेटमा बेल्जियमका टिमोथी कास्टाग्नेले आफ्नै पोस्टमा गोल गरेपछि इजराइल बराबरीमा फर्किएको थियो ।
बेल्जियमका टाइलेमान्सले ४८औं मिनेटमा गोल गर्दै घरेलु टोलीलाई पुनः अग्रता दिलाए । ५२औं मिनेटमा ब्रुयनले पेनाल्टीमा गोल गर्दै बेल्जियमलाई ३-१ गोलको जित दिलाए ।
